"Simeira CPLP Besik Ona, Dili Sei Sabraut"

.

Jornal Nacional Diario -Tersa-feira, 25 Fevereiru 2014 

Iha fulan Julhu mai Timor-Leste sei lidera Simeira Comunidade Pais Lingua Portuguesa (CPLP) ne'ebe hala'o iha kapital Dili, maibe to'o agora kondisaun Dili lao sabraut hela. 

Atu hamorin TL iha mundu internasional no fasilita Simeira CPLP la'o diak, tenki hare no kondisiona fatin sira hanesan lixu tenki tau iha fatin, lori negosiante sira ba iha Merkadu, hadia fatin turizmu, hadia dalan ne'ebe kuak iha Dili no ba Distritu se bainaka hakarak vizita. 

Deputadi Francisco Branco husi bankada FRETILIN lamenta ho kondisaun no situasuan ne'ebe TL infrenta agora, tanba Dili ne'ebe sai kapital nasaun lao la organizadu. 

"Ita haree ikan no na'an fa'an arbiru deit iha dala-dalan, negosiante ki'ik sira fa'an sasan rahun iha roda tolu hamrik tuir dalan, i aat liu tan mak situasaun Dili kalan maten liu, (ema la lao ba mai), seguransa kalan laiha, Governu tneki hare ida ne'e, tanba ema mai tuir simeria ne'e sei hare buat hotu, ne'ebe buat hotu tenki organizadu," dehan Deputadu Francisco Branco, iha sala plenaria, PN segunda (24/2). Ia hatutan, bainhira atu lori negosiante ne'ebe faan ida dal-dalan ba merkadu Manleuana, Taibesi no Tasitolu, maibe administrador dehan kondisaun la diak, nune'e husu ba governu atu uza osan didiak hodi jere oinsa tau negosiante kiik sira ne'e iha nia fatin, tanba simeria CPLP besik ona. 

Nia afirma, Ministeriu hotu tenki iha koordenasaun diak oinsa halo jestaun ne'ebe mak diak iha kapital ne'e, tanba komunidade internasional sira mia sei vizita iha Dili laran, saida mak akontese bainhira sira hare kapital nasuan deit foer no dezorganizadu (la tau buat hotu iha nia fatin). 

Deputadu ne'e kestiaona tan kona ba deguransa kalan, ema lao la dun seguru, liga ho mate isin ne'ebe latan hela iha Edifisiu Ministeriu negosiu estranjeiru no Kooperasaun (MNEC) nia oin, nia husu atu komadante PNTL tau sirkulasaun membru Polisia iha tempu kalan. 

Tantu deputada Bendita Moniz Magno husi Bancada CNRT mos hatutan, presiza tau matan ba kondisaun sidade, tanba ne'e dignidade nasuan iha ema liur nia oin. 

Nune'e mos, sorumutu konsellu Ministru ne'ebe hala'o iha Tersa 918/2) foin lalais ne'e, konsege aprova ona rezukusaun ida ba kriasaun komisaun preparasaun Simeria CPLP nian, ne'ebe mak sei lidera husi prezidenti Partidu FRETILIN Francisco Guterres 'Lu-Olo'. Rezulusaun ne'e, Governu hakotu hodi harii komisuan simeira CPLP nian ne'ebe Francisco guterres Lu-Olo mak sei prezide. 

Misaun boot komisaun ne'e nia mak, propoin no organiza asuntu hirak ne'ebe atu dezenvolve durante enkontru iha fulan Julu ne'e, no hodi refleta saida mak tenke halao durante tinan rua oin mai. 

Ho Simeria komunidade nasaun lian Portuguesa ne'ebe besik dadaun ona, ne'ebe mak sei halao iha Dili iha fulan Julu, hodi loke prezidensia Bienal, (tinan rua dala ida), 2014-2016, Timor-Leste nian ba da uluk iha organizasaun internasional.

,