Alterasaun Ba Lei Positivu: “Veteranus Falsu Sei Kastigu Tuir Lei”

.

Jornal Independente - Tersa-Feira, 21 Agustu 2012

Prezidenti Republika Taur Matan Ruak, Parlamentu Nasional no Governu aseita atu halo alterasaun ba lei veteranu ne’ebe konsidera fo benefisiu ba ema balun de’it.

Entertantu, iha tempu badak sei kria konsellu veteranus hodi identifika veteranu falsu atu prosesa tuir lei kodiku penal, ne’ebe konsagra ona iha konstituisaun RDTL.

Taur husu ba Parlamentu Nasional atu fo perioridade ba alterasaun lei veteranus hodi nune’e bele rekonese mos ema tomak ne’ebe partisipa iha luta durante tinan tolu nia laran.

Xefe estadu fo ezemplu, lei veteranu ne’ebe rekoinese de’it ema ne’ebe luta husi tinan walu to’o tinan 14 no husi tinan hat to’o 24.

“Halo nusa mak altera lei veteranu nian para inklui sira ne’ebe mak seiduak inklui,” dehan Taur Matan Ruak iha Becora (17/8).

Prezidenti Republika Taur dehan, istoria FALINTIL nuudar patrimonia povu Timor Leste tenki konta jerasaun foun, konta tenki hahu husi 1975 to’o independensia nian.

Hodi responde ezizensia ne’e, Parlamentu nasional promete, iha tempu badak sei halo alterasaun ba lei veteranus liuliu povu tomak ne’ebe luta ba ukun rasik an.

Ba kestaun ne’e, Eis Primeiru Ministru Mari Alkatiri dehan, sistema implementasaun lei veteranus fraku loke espasu ba veteranus falsu hodi hetan pensaun husi estadu, tuir nia, veteranus falsu tenki fo sensaun tuir lei kodigu penal konstituisaun RDTL ne’ebe vigora iha Timor-Leste.

“Tenki kria sitema ne’e forte atu labele konfuzaun katak, se mak veteranus no se mak la veteranus i sala barak, dehan Alkatiri.

Lei kodigu penal regula klaru ona katak, sidadaun sira ne’ebe falsifika dadus ba interese privadu husi estadu sei hetan sensaun, tamba ne’e ita la presiza kria tan lei ruma tuir veteranus balun ezizi maibe nia implementasaun lei ne’e mak tenki lololoos no momoos.

“Ne’e krime iha ona kodigu penal kuandu falsu deklarsaun ne’e, la presiza halo lei, se mak laos veteranus dehan nia veteranus i se mak halo komplesidade, ba sira hotu ne’e, iha ona kodigu penal,” dehan Alkatiri.

.