“Parte Alfandega Airo-Porto Comoro Detekta Sidadaun Franceza Lori Pistola Ilegal”

.

Notisia Husi TVTL - Tersa-Kalan, 28 Agustu 2012

Airo-Porto Komoro, Dili detekta sidadaun Franceza ida ne’ebe atu lori sai pistola ida ba Australia, sidadaun Franceza ne’e, oras ne’e dadaun submete ba prosesu investigasaun.

Terca-feira (28/8) iha Airo-porto Nikolau Lobato husi parte Alfandega konsege detekta pistola ida ho tipu P-99 ne’ebe sidadaun Franceza ida atu lori sai ba Darwin, Australia, tuir komandante servisu investigasaun kriminal Supertendente Kalistro Goncaga katak, Anton Balleza nuudar sidadaun Franceza neebe tenta lori pistola ne’e hanesan sample ida atu sosa iha rai liur, tuir pedidu husi ema Timor oan ida.

Komandante ne’e la fo sai sidadaun Timor oan ne’ebe husu atu sosa kilat ne’e, maibe ema ne’e identifika ona.

“Pistola ne’e hetan iha Airo-Porto, husi sidadaun Franceza, nia agora tuir hela prosesu investigasaun, nia lori Pistola ne’e hanesan sample ida ba nia, depois nia ba hola no lori mai Timor atu fo ba nia kolega ema Timor oan ida, Pistola ne’e hetan iha nia pasta laran” dehan Calistro.

Pistola refere oras ne’e sei tau hela iha Polisia investigasaun hodi prosesa, tuir komandante serviso investigasaun Kriminal Calistro Gonzaga informa katak, maske pistola ne’e hanesan brinkeirus maibe bele mos hamate ema wainhira troka bala, Sidadaun refere oras ne’e prosesa hela iha Polisia Investigasaun Kriminal.

Sidadaun Franceza ne’e tama iha Timor Leste iha loron 2 fulan Agusto liu ba, husi fronteira Batugade no tuir planu Terca-feira ne’e atu fila ba Darwin Australia, maibe la konsege tamba sei submete ba prosesu investigasaun.

.