Ema Deskoinesdiu Asaltu Komunidade Tibar: “Deskonfia Membru F-FDTL Envolve Iha Asaun Ne’e”

.

Notisia Husi TVTL - Segunda-Kalan, 27 Agustu 2012

Iha Sabadu fim de semana liu ba, grupu ida halo asalta hodi baku rahun uma 2, kareta 2 no motor 1, inklui ema ida hetan kanek, Problema ne’e, deskonfia envolve elementus Falintil-Forsa Defesa Timor Leste (F-FDTL).

Akontesementu ne’e mosu iha sabadu kalan iha Tibar no haraun uma 2, Biskota 1, taxi 1 no motor 1, inklui ferik ida hetan kanek, sasan ne’ebe rahun iha uma laran hanesan, komputador, Televizaun, Parabola, Ortorio no sasan seluk tan.

Rogerio da Silva dos Santos no vitima sira seluk, ba TVTL hateten katak, akontesementu ne’e iha tuku 8 kalan, vitima sira mos haktuir katak, ema ne’ebe involve iha grupu ne’e, balun mai husi Dili no balun mai husi Tibar, Rogerio hateten katak, grupo ne’e lidera husi membru F-FDTL ida.

“Halo rahun tiha uma hotu, nia ho motor GL Max, Motor ne’e Kantor F-FDTL nian, depois sira halo rahun hau nia sasan uma laran hotu, hau hakilar ba nia hotu tiha, nia dehan rahun ona, sira hotu-hotu hataan dehan rahun ona, sira halo rahun uma no tuda tan fatuk mak hau nia tian ida hetan tuda iha oin hodi labaraik halai sai husi kotuk, hau hare rasik ho matan, rona rasik, nia (Membru F-FDTL) naran Abrio Ramos segundu serjentu” dehan Rogerio.

Aliende ne’e, Vitima sira seluk haktuir katak, akontesementu ne’e dala barak ona, tamba ne’e ukun nain sira tenki tau atensaun diak ba problema ne’e, no mos tenki toma atensaun ba membru F-FDTL ne’ebe involve iha kazu refere.

“Sira aserka tiha ami mak tuda, hau haree Abrio para hela ne’ebe, buat tomak Forsa ne’e tur hela iha motor leten dehan imi hein iha ne’e, hau bolu Forsa agora, imi sira farda metan ne’e mak lakohi malae iha Timor ne’e,” dehan sasin ne’e.

Antes ne’e, iha akontesementu ida neebe hakanek joventude ida no estudante feto ida, ne’ebe taa husi ema deskoinesidu iha parte Tibar nian.

To’o oras ne’e, Polisia sei halo investigasaun ba kazu ne’e, konaba elementus F-FDTL ida ne’ebe deskonfia envolve iha kazu ne’e, TVTL tenta halo konfirmasaun ba dirasaun F-FDTL maibe la konsege.

.