Governu La Tau Atensaun: “Komunidade Bedois Halerik Ba Bee Moos”

.

Notisia Husi TVTL - Kuarta-Kalan, 22 Agustu 2012

Komunidade Bedois Suku Camea esforsu hodi buka Bee moos to’o iha Kolmera tamba durante ne’e sira la asesu ba bee moos.

Bee moos hanesan nesesidade baziku ne’ebe labele haketak husi vida moris loroloron, tamba ne’e, halo povu sira tenki lao dook hodi buka bee moos maske distansia bele to’o kilometru 5 ka 6.

Realidade ne’e akontese ba komunidade sira ne’ebe hela iha Aldeia Bedois Suku Camea, ne’ebe besik tinan 5 nia laran ona sira la hetan bee moos.

Situasaun ida ne’e obriga sira tenki lao dook buka bee moos husi sira nia hela fatin tamba ministeriu ne’ebe kompotente la rejolve problema neebe sira infrenta.

“Bee iha ami nia fatin laiha, se ami la kuru bee ami lori saida mak tein no hariis, ami hela iha Aldeia Bedois Ailele-Hun, Suku Camea, ami husu ba boot sira atu liga bee ba iha ami nia hela fatin” dehan Komunidade ne’ebe kuru bee iha Jardim Kolmera.

Problema ne’ebe povu sira infrenta, presija Governu tau atensaun, bee hanesan nesesidade baziku ne’ebe presija loron kalan, falta bee ba ita nia moris ita mos labele moris, tamba ida ne’e, hakarak ka lakohi Governu foun tenki tau atensaun maka’as ba nesesidade ida ne’e.

.