Rezultado Otopsia: “Cristovao Hetan Baku Ho Martelu”

.

Jornal Nacional Diario - Kinta-Feira, 23 Agustu 2012

Mate isin membru F-FDTL, Alferis Cristovao da Silva, Tersa (21/8), submete ba otopsia iha Hospital Nasional Guido valadares (HNGV), husi rejultadu otopsia ne’e hatudu katak, Cristovao da Silva mate tanba baku husi ema deskoinesidu ne’ebe mak uza martelo ho Besi kanu.

“Husi rejultadu mediku hatudu katak, ema kriminozu balun mak oho duni ita nia membru F-FDTL ida ne’e, laos tuda ho fatuk ou ai, maibe lori martelu ou besi kanu mak baku,” informa Luis Gaspar nuudar familia vitima ba Jornalista sira iha uma matebian, Quintal Boot, Dili, Kuarta (22/8).

Iha parte seluk, Agustinho Soares Gaspar, nudar mos familia vitima esplika kronolojia akontesementu ne’e, katak, iha loron 12 Agostu, Vitima sai husi Audian atu mai hare nia aman moras iha Quintal Boot (maizumenus tuku 4:00 madrugada), maibe to’o iha dalan klaran Santa Cruz vitima hetan baku husi grupu deskoinesidu iha parte ulun fatuk karuk.

Tuir informasaun katak, antes akontese ne’e, iha fatin refere grupu deskoinesidu rua mak baku malu nune’e hetan atuasaun husi parte seguransa ne’ebe fo tiru hodi neutraliza konfrontos.

Ba kestaun ne’e, familia eziji ba parte kompotente atu halo investigasaun ba kazu refere no kaptura lalais suspeitu.

.