“PN Husu Rezolve Problema Grupu CPD-RDTL”

.

Jornal Independente - Kinta-feira, 20 Dezembru 2012

Parlamentu Nasional liu husi komisaun B asuntu negosiu estranjeiru defeza no seguransa husu ba governu atu rezolve ona problema grupu CPD-RDTL ne’ebe to’o agora sei okupa illegal povu nia rai iha area Welaluhu, Same.

Antes ne’e, Ministru defeza Seguransa atual Primeiru Ministru Xanana Gusmao hateten, koordenador grupo CPD-RDTL mak tenki responsablidade ba problema ne’e.

Presidenti Komisaun B Maria Lurdes Mbesa dehan liu husi relatoriu peskiza ne’ebe komisaun ne’e, hala’o diretamente ba area Welaluhu (Grupu CPD-RDTL) mobiliza ba, entrega ona ba Ministru Defeza no Seguransa xanana Gusmao no husu atu rezolve lalais problema ne’e.

 “Ami ninia husu (relatoriu) mak tenki rezolve lalais husi instituisaun Ministru defeza no seguransa,” hatete Mbesa iha Parlamentu Nasional (19/12). Maski relatoriu ne’e komisaun B entrega ona ba MDs maibe to’o agora seidauk iha resposta klaru kona ba prosesu atu rezolve problema grupo CPD-RDTL nian ne’e.

“To’o agora ami laiha informasaun, hau rasik husu ba sekretariu estadu seguransa mais seidauk hetan informasaun konkretu prosesu ne’e to’o ona iha ne’ebe no halo nusa ba oin,” tenik Presidenti Komisaun B Maria Lurdes Mbesa.

 Entertantu, Deputadu husi Bancada CNRT Arao Noe husu ba koordenador CPD-RDTL Aitahan Matak tenki responsabliza ba mobilizasaun grupo ne’e nian iha area Welaluhu hodi okupa populasaun nian rai no hamosu situasaun traumatizadu ba povu iha area ne’eba.

“Responsablidade tenki husu ba koordenador grupo CPD-RDTL ne’ebe mobiliza,” dehan Arao Noe iha uma fukun PN (19/12).

Nune’e, antes ne’e, Komandante F-FDTL Major Jeneral Lere Anan Timur hatete, F-FDTL pronto fo seguransa ba komunidade no grupu CPD-RDTL hodi labele kria problema. Nia dehan, F-FDTL sei la halo atuasaun ba prezensa CPD-RDTL, tanba hotu-hotu Timor oan no seidauk estraga komunidade sira nia tos no seidauk halo krime ida hasoru komunidade.

.