“Povu Zumalai Sei Halo Asaun Hasoru Governu”

.

Jornal Timor Post - Kinta-feira, 20 Dezembru 2012

Populasaun iha Sub Distritu Zumalai, Distritu Covalima ameasa sei hala’o asaun pasifika ida hasoru governu, tanba la hetan benefisiu husi prosesu dezenvolvimentu nasional.

 Povu Zumalai sei hala’o asaun pasifika tanba konsidera implementasaun projeitu dezenvolvimentu lao la dun diak iha sub Distritu refere.

 Lia hirak ne’e hato’o husi Administrador Sub Distritu Zumalai, Manuel Freitas via telefone ba Timor Post husi Zumalai kuarta foin lalais ne’e.

Tuir Manuel Freitas katak, Povu Sub Distritu Zumalai ezizji ba iha servisu agua e saneamentu Distritu Covalima no nasional atu klarifika ba povu, ne’ebe tuir lolos tenki implementa ona projeitu bee moos iha tinan 2010-2012.

“Tanba nia orsamentu aprova tiha ona, maibe tanba sa mak labele implementa, ho razaun ida ne’e mak husu klarifikasaun sobre asuntu ida ne’e,” hatuir nia via telefne.

Administrador Sub Distritu Zumalai mos sublina katak, karik laiha informasaun mai husi dirasaun kompotente mak povu iha Sub Distritu refere sei halo asaun pasifika, tanba ho razaun katak, povu iha Sub Distritu ida ne’e tenki hetan ba implementasaun ba projeitu dezenvolvimentu nasional.

Entertantu, lamentasaun ne’e hato’o, bazeia ba proposta orsamentu ba implementasaun projeitu bee moos iha Sub Distritu Zumalai, iha ona tinan 2010, maibe la konsege realiza, nune’e mos iha tinan 2012 orsamentu iha ona maibe kontinua kansela.

Ho ida ne’e Povu Zumalai konsidera katak, hetan diskriminasaun iha implementa projeitu dezenvolvimentu nasional, liuliu ba iha sub Distritu refere.

 Hatan ba kestaun ne’e, parte servisu agua e saneamentu Distritu Covalima rekuinese katak, tuir lolos projeitu bee moos ba iha kapital Sub-Distritu Zumalai tenke implementa duni ona iha tinan ne’e, tanba iha ona orsamentu, maibe tanba sa mak lakonsege implementa, ho ida ne’e nia labele fo resposta tamba obra refere toma konta husi diresaun nasional.

,