“CPD-RDTL Okupa Rai Estadu”

.

Jornal Nacional Diario - Segunda-feira, 17 Dezembru 2012 

Porta Voz Conselho Popular Demokratika-Republika Demokratika Timor Leste (CPD-RDTL), Gil Fernandes hateten rain ne’ebe CPD-RDTL okupa iha Welaluhu, Distritu Manufahi laos okupa rai komunidade nian, maibe rai estadu ne’ebe uluk uza ba transmigrasaun Indoenzia sira. 

Tanba ne’e, CPD-RDTL rejeita total deklarasaun ne’ebe hato’o husi Xefi Suku Klakuk, tanba halo akuzasaun falsu no kria polimika iha komunidade lokal no publiku em jeral. 

 Gil Fernandes esplika, rai ne’ebe CPD-RDTL sira okupa laos rai privadu populasaun nian, maibe rai eis transmigrasaun uluk tempo Indonezia nian ne’ebe sai propriedade estadu nian. 

 “Ami CPD-RDTL hakarak fo hatene ba ema hotu iha Timor Leste laran tomak katak, kombatentes, veteranus no OPTT ne’ebe dadaun prezensa iha Kiar Welaluhu Manufahi ne’e, atu paroveita rai bokur ba koperativa nasional nudar banati diak ba Timor oan hotu ne’ebe hakarak Independensia ekonomia hodi foti RDTL nia kapasidade ekonomia, no kore nia independensia ba rai seluk. 

Tan ne’e, deklarasaun ne’ebe mak hato’o husi Xefi Suku Klakuk no komunidade sira iha kiar Welaluhu ne’e hanesan akuzasaun ne’ebe falsu no atu kria polimika iha komunidade lokal no publika,” hateten Gil Fernandes ba Jornalista sira, liu husi konferensia ba imprensa Sesta (14/12), iha balide Dili. 

 Porta Voz CPD-RDTL ne’e hatutan katak, Kombatentes, veteranus no OPTT tama iha rai kiar Welaluhu ne’e seidauk hadau ema ou rai privadu ba uza maibe, aproveita rai transmigrasaun ne’ebe mak okupante ema Indonezia sira husik hela nudar estadu nia propriedade ba interese ekonomia nasional,” dehan Gil Fernandes.

.