“SAMES Rai Aimoruk Liu Prazu”

.

Jornal Timor Post - Sesta-feira, 21 Dezembru 2012 

Asosiasaun Emfermeiru Timor Leste (AETL) Distritu Dili husu atu aimoruk sira ne’ebe maka rai hela iha SAMES ho kondisaun liu ona prazu presiza destroi tanba bele fo impaktu ba komunidade sira nian saude. 

“Ami husu atu aimoruk ne’ebe liu prazu, tenki destroi atu nune’e, labele fo impaktu ba iha envairumentu liu-liu prezudika ba kondisaun saude komunidade,” hateten Prezidenti Asosiasaun Emfremeira Timor Leste (AETL) Dili, Santana Martins, wainhira akompania vice Ministra saude ba haree Armazen SAMES iha Kuarta feira ne’e (19/12). 

AETL Distritu Dili ne’e husu atu bainhira lori aimoruk liu prazu sira ne’e ba iha Tibar, antes ne’e SAMES tenki halo kordenasaun ho autoridade lokal sira iha Tibar, hodi nune’e komunidade sira iha Tibar labele hakbesik an, tanba selae bele fo impaktu ba komunidade nia saude. 

Entertantu, ba kestaun ne’e, waimhira Timor Post hakarak atu dada lia ho Vice Ministra Maria do ceu, maibe Vice Ministra lakohi fo komentariu tanba duni tempu no oras hodi ba tuir inkontru iha Konsellu Ministru. 

Tuir observasaun Timor Post iha armazen SAMES hatudu katak, kuaze iha aimoruk barak maka tau hela ho kondisaun uma ne’ebe la saudavel, kondisaun rai aimoruk ba ne’e la diak, anin bele tama sai ho vontade no plapon uma nian balun mos at ona. 

Entertantu, Prezidenti AETL Distritu Dili Santana Martins mos preokupa no konsidera sistema medical check up iha Hospital Nasional Guido valadares (HNGV), durante ne’e la fo vantazen ba governu, liliu hasai resis no laboratorium ba tes serologia. 

.