“Ban Ki-Moon Aseita ONU Husik Timor Leste”

.

Jornal Independente - Kinta-Feira, 16 Agustu 2012

Sekretariu Jeral Nasoens Unidas (ONU) Ban Ki-Moon laiha duvidas no konsidera Timor-Leste nuudar nasaun ida ne’ebe fo ezemplu ba mundu.

“Timor-Leste hetan progresu barak ona, ita boot sira tenki orgullo tebe-tebes,” dehan Ban Ki-Moon bainhira halo konferensia imprensa iha palacio PR, kuarta horsehik.

Realidade, Ban Ki-Moon dehan, Timoroan hatudu ona iha eleisaun Prezidensial no eleisaun parlamentar ne’ebe liu ho susesu laiha violensia.

“Progresu ne’e la’o ho pasifiku ho hakmaten no refleta Timor-Leste nia kumprimisiu forte ba estabilidade demokrasia no unidade nasional,” dehan Ban Ki-Moon.

Sekretariu Jeral ONU ne’e mos orgullu ba progresu iha seitor seguransa no defesa no seitor dezenvolvimentu.

Ban Ki-Moon dehan, bainhira akontese krizi 2006 liu fulan 16 de’it, PNTL bele metin fali hodi garante paz no estabilidade iha Timor-Leste.

Sira la halo deit diferensia iha nasaun laran maibe halo diferensia iha mundu tomak,” dehan Ban Ki-Moon ne’ebe halo ona vizita dala rua mai Timor-Leste.

Lakleur tan mandatu ONU sei remata, Ban Ki-Moon dehan, nia hakbesik an ona ho lider Timoroan hodi determina ONU nia involvimentu iha Timor-Leste ho forma foun, susesu hirak ne’e, Ban Ki-Moon laiha duvidas ona ba Timor-Leste atu kaer rasik estadu.

Ban Ki-Moon mos aseita misaun ONU remata iha fulan Dezembru, tanba hare ba susesu Timor-Leste sai uniku iha mundu bele halais dezenvolvimentu ho signifikantes tebes.

“Iha ambiente ne’ebe pojitivu ne’e katak, Nasoens Unidas prepara hela UNMIT atu remata iha tinan ida ne’e nia rohan,” haktuir Ban Ki-Moon iha nia diskursu.

.