CNT Laiha Kapasidade: “Inacio Moreira Husu Kuitadu Ba Estrada Protokolu Ne’ebe Laiha Kualidade”

.

Jornal Timor Post - Kinta-Feira, 16 Agustu 2012

Deputadu Parlamentu Nasional konsidera Grupu Konsorsiu Nasional Timor Leste (CNT) laiha kapasidade atu halo estrada iha Dili laran tanba estrada ne’ebe halo la to’o semana ida at fali ona no piur liu tan halo tiha estrada abandona fali.

“Ami husu ba Prezidenti parlamentu nasional atu foti medidas no reasaun ruma ba grupu CNT, se lae, kuitadu, kualidade estrada hirak ne’e ita la garante nia kualidade, tanba gasta osan povu nia saugate de’it,” informa deputadu Bancada FRETILIN, Inacio Moreira foin lalais ne’e iha uma fukun Parlamentu Nasional, Dili.

Nia hateten, ezemplu konkreta estrada iha area Hudi-laran (Bairu-Pite) no estrada klaran atu halo jardin husi Palasiu Prezidenti to’o Comoro, maibe na realidade to’o agora sei grave nafatin.

“La hatene kompania ne’ebe kaer ne’e, nia paradeiru iha ona ne’ebe, pior liu tan mak estrada hirak ne’e laiha kualidade, ne’e hatudu katak, grupu CNT ne’ebe kaer projeitu laiha kapasidade,” nia tenik.

Nia mos hatutan tan, estrada protokolu ne’ebe foin dadauk halo hodi komemora loron 20 de maiu, iha momentu ne’eba kompania sira halo servisu ho ulun ain para hatudu sidade Dili nia oin ba konvidadus husi nasaun seluk, maibe liu tiha 20 de Maiu estrada ne’e paradu to’o ohin loron.

Ba kestaun ne’e, lamentasaun hanesan hato’o mos husi deputadu Virgilio da Costa Hornai husi bancada PD katak, estrada protokolu ne’ebe foin hadia maibe balun komesa at ona, ida ne’e hatudu grupu CNT ne’ebe kaer obra refere laiha responsablidade.

Nia hateten, se ida ne’e mak Governu la foti medidas bele prejudika orsamentu estadu, tan ne’e, nia husu ba Ministeriu kompotente tenki hola asaun seriu ba grupu CNT para labele estraga orsamentu povu nian.

.