“Kandidatu PNTL 271 Eziji Tama Akademia PNTL”

.

Jornal Timor Post - Kinta-Feira, 16 Agustu 2012

Kandidatu Polisia Nasional Timor Leste (PNTL) husi etapa II hamutuk 271 ne’ebe liu selesaun iha fulan hirak liu ba eziji atu tama lalais Akademia Polisia.

“Ami hasoru malu ona ho Sekretariu Estadu seguransa (SES), Francisco Guterres, iha dia 8 liu ba, iha hasoru malu ne’e Sekretariu Estadu Seguransa hateten ba ami katak, kandidatu PNTL ba segundu fase sei tama academia polisia iha loron 15 fulan Agusto, maibe to’o data ne’ebe promete laiha nafatin informasaun baa mi,” informa kandidatu PNTL, Jonas Fernandes ba Timor Post, iha tasi ibun Palasiu do Governu

nia oin, Kuarta (15/8).

Situasaun ne’e, halo sira duvida, tamba tama ona ba loron 15 Agustu maibe husi parte SES ho komando PNTL seidauk taka sai avizu ofisial ruma ba kandidatu sira.

Jonas haktuir tan katak, SES ho segundu komandante PNTL koalia diretamente ho sira iha Akademia Polisia Komoro, katak sei halo fali teste mediku atu bele hatene fali kandidatus sira nia kondisaun saude atu nune’e kandidatu PNTL hafoin kandidatu PNTl primeira faze remata, sira segundu faze tama kedas hodi treinu maibe to’o agora seidauk iha rejultadu.

Kandidatu ne’e mos konfesa, objetivu sira halibur malu nakonu iha Palasiu Governu oin ne’e atu fo ideas ba malu hodi buka solusaun ba problema ne’ebe sira infrenta.

Tuir konkordansia ne’ebe kandidatu sira halo, iha loron 3 setembru, sira nain 271 sei halibur malu fali iha palasiu Governu oin hodi hein rejultadu pozitivu husi SES ho instituisaun PNTL nian.

.