“Sekjer Ban Ki-Moon Husu Governu Foun Atu Halakon Korupsaun”

.

Notisia Husi TVTL - Kinta-Kalan, 16 Agustu 2012

Sekretariu Jeral Nasoens Unidas Ban Ki-Moon orguilho tebes ho susesu eleisaun Prezidensial no Parlamentar to’o forma Governu foun.

Ban Ki-Moon husu ba Governu foun atu iha responsablidade hodi halakon korupsaun no servisu ba interes komum.

Ban Ki-Moon hato’o lia hirak ne’e wainhira hala’o vizita ba Parlamentu Nasional Kuarta-feira (15/8) semana ne’e.

Ban Ki-Moon hateten, eleisaun Parlamentar no Prezidensial la ho susesu tamba instituisaun sira iha responsablidade no kapasidade hodi fo seguransa durante periodu eleitoral.

“Iha eleisaun Prezidensial no parlamentar, iha tinan ida ne’e, sai susesu ida ne’ebe boot tebe-tebes, ita boot sira nia instituisaun nasional hatudu sira nia kapasidade ne’ebe aumenta ba beibeik hodi hala’o eleisaun iha futuru sei apoiu husi internasional, hau hahi povu Timor-Leste tamba bele hakat ba vota ho maneira ida ne’ebe pasifiku no hakmatek no mos pozitivu tebes, katak, ema hotu bele simu rejultadu eleisaun nian hodi hakat ba formasaun Governu no tomada de pose ba Parlamentu ida ne’e, progresu hirak ne’e hotu reflete Timor-Leste nia promesa iha estadu demokratika,estadu de dereitu no harii futuru ida ne’ebe metin,” haklaken Ban Ki-Moon ho lian ingles.

Iha okajiaun ne’e, Ban Ki-Moon mos husu ba Parlamentu Nasional atu konsolia opinoens ne’ebe diferente hodi servisu hamutuk hodi atinji meta komum.

“Iha maneira oioin, servisu todan sira hahu agora, hahu iha fatin ne’e, nu’udar deputadu eleitu, ita boot sira hetan ona konfiansa solene, ita boot sira iha responsablidade boot tebes atu debate kestaun hirak ne’e hodi rona lian ida-idak ne’ebe lahanesan, hodi rekonsilia opiniaun ne’ebe diferente no mos hodi reflete vontade no preokupasaun sira ne’ebe mai husi Timor oan sira rasiksira mos ezizi estadu ida ne’ebe responsablidade no transparansia ne’ebe bele halakon korupsaun no serviso ba interese komum,” dehan Ban Ki-Moon ho lian ingles.

Sekretariu jeral ONU mos husu atu Timor Leste avansa iha dezenvolvimentu, kontribui barak hodi promove pas no seguransa no empoderamentu ba feto no foin sa’e sira.

.