“Deputadu Bloku Koligasaun No Opozisaun Iha PN Preokupa Ho Kondisaun Estrada”

.

Jornal Nacional Diario - Kuarta-Feira, 15 Agustu 2012

Reprejetante Povu iha uma fukun Parlamentu nasional (PN) kontinua preokupa ho kondisaun estrada iha Dili laran neebe mak kontinua at ba bei-beik.

Iha Intervensaun, Deputadu Virgilio Hornai husi Bancada PD hatete, estrada iha cidade laran ne’e kontinua at ba beibeik, maibe ita nia ministeriu nebe iha kompetencia maske sira hare ho matan mas husik hela de’it.

“Dala ruma ita la’o. ita hare rai rahun maka falun tiha kareta ho motor sira ne’ebe lao iha estrada laran, ida ne’e impaktu husi estrada ne’ebe mak at ne’e dala ruma mos bele halo ema moras,” dehan Virgilio terca (14/8) iha PN.

Nune’e mos, deputada Ilda da Consecaun husi bancada FRETILIN hatete, estrada iha Dili laran ne’e halo nia durasaun nunka to’o longu prazu, maibe sura semana no fulan deit komesa at ona, komesa iha kuak-kuak ona.

“La hatene halo estrada mak kualidade laiha ka, ou nia material mak laiha kualidade, tanba ita hare estrada ne’e la kleur at, ida ne’e oinsa, liu-liu ita haree iha parte Delta nian, halo sori-sorin sira ne’e mesak kuak deit,” afirma nia.

Lia hanesan mos hato’o husi deputadu mateus de jesus husi Bancada CNRT hateten, problema estrada durante ne’e sai prokupasaun boot ba povu sira, tanba ne’e, Governu tenki fo atensaun ba estrada nebe mak at liu iha kapital Dili.

‘Impaktu husi estrada ne’e mos halo macet, ema ne’ebe urjenti atu ba fatin ruma mos defisil ituan, tanba impaktu husi estrada ne’ebe kuak barak, halo kareta ho motor lao rungu ranga deit, liu-liu iha kapital Dili” dehan nia.

.