Obra Atu Iha Kualidade: “Ministru Labele Hili Kolega-Familia”

.

Jornal Nacional Diario - Kuarta-Feira, 15 Agustu 2012

Membru Parlamentu Nasional husu ba Ministru Obras Publiku atu hasai tenderizasaun ba projetu ruma labele hili deit kolega no familia emprejariu sira tamba projeitu ne’ebe fo, tandeit kolega no familia sei la garante nia kualidade.

Deputadu Bancada FRETILIN, Inacio Moreira hateten, FRETILIN husi inisiu to’o agora sempre koalia beibeik ba sasan hotu ne’ebe hala liu-liu projeitu neebe halo ne’e laiha kualidade, tanba laiha kapasidade jestaun ne’e mak sai problema bo’ot.

“Iha plenaria ordunariu deputadu sira kestiaona kualidade estrada iha fatin hotu, ne’e hatudu momos katak, Ministru sira balun laiha duni kapasidade, estrada ne’ebe halo tiha ona, liu deit fulan rua aat fila fali,” dehan deputadu Inacio Moreira ba JNDiario Tersa (14/8) iha PN.

Deputadu Inacio mos sujere ba GOvernu, sekarik halo servisu iha ne’e hotu-hotu halo servisu tuir lei, hahu husi prosesu aprovizionamentu, nune’e kuandu hili kompania ka kontrator tenki iha kualidade.

Nune’e nia hatutan, kompania ne’e tenki iha kondisoens labele hili kolega no familia de’it, nune’e halo serviu ho diak no kualidade.

“Dala barak ita la rona malu, lakohi ema seluk atu hatete ba sira entaun halo buat ida tuir ida-idak nia gostu fali, i aat liu fali buka sira nia maluk de’itmak kaer obra, liu-liu kargu Ministru no Sekretariu Estadu,” esplika nia.

.