“FRETILIN Promete Ajusta Lei Deklarasaun Riku Soin”

.

Jornal Independente - Kinta-Feira, 16 Agustu 2012

Bancada FRETILIN iha Parlamentu Nasional promete sei ajusta (kompleta) lei deklarasaun riku soin atu iha forsa hodi regula ukun nain sira.

Durante ne’e, liuliu komisaun Anti Korupsaun (KAK) la konsege identifika riku soin ne’ebe membru Governu iha tamba laiha lei ida espesifiku hodi fo poder instituisaun ida hodi regula.

Iha lejislatura anterior konsege aprova duni lei ida hodi regula rikusoin membru governu nian maibe lei refere enjeral de’it hodi laiha espesifikamente no fo poder ba instituisaun ida hodi implementa lei ne’e.

Tanba ne’e, Bankada FRETILIN iha lejislatura ne’e esforsu maka’as ajusta lei refere hodi fo duni poder lolos ba instituisaun kompotente.

Vise Prezidenti Bancada FRETILIN deputadu Francisco Branco hatete, antes ne’e PN aprova ona lei ida maibe ladun iha forsa ba instituisaun kompotente.

Tamba ne’e, nia dehan, dala barak politiku sira koalia no eziji inklui sosiedade sivil sira hodi deklara riku soin labele akontese.

“Lei ida tenki iha kuadru legal que espesifiku liu atu bele regula, idea jeral ne’e mak atu hatene deit se mak iha autoridade hodi kaer dokumentu sira ne’e,” deklara nia iha PN, Kuarta (15/8).

Situasaun ne’e, FRETILIN sei tau perioridade hodi hetan ajustamentu iha lejislatura ne’e.

Intensaun mak deputadu FRETILIN ne’e dehan katak, kada tinan rua tenki iha avaliasaun ba riku soin membru Governu inklui deputadu sira.

Antes ne’e, parte Komisaun Anti Korupsaun (KAK), informa ba publiku katak, instituisaun refere sei labele halo investigasaun, liliu atu deklara rikusoin membru governu nian tamba laiha lei ida hodi fo poder.

.