“Bancada FRETILIN Pesimista PN Sei Laiha Poder”

.

Jornal Independente - Kinta-Feira, 16 Agustu 2012

Bancada FRETILIN pesimista ho Parlamentu Nasional iha terseira lejislatura ne’e hodi halo duni nia kna’ar loloos hanesan lejislador no fiskalizador.

Bancada FRETILIN senti pesimista ho PN foun ne’e, tanba konsidera laiha mudansa ba estabilesimentu komisaun espesializada PN nian hodi hala’o nia knaar tuir lei haruka.

Vise Prezidenti bancada FRETILIN, Deputadu Francisco Branco hateten, loloos komisaun espesializada iha terseiru lejislatura ne’e presiza iha mudansa, liuliu hamenus komisaun atu iha efetividade servisu.

Nia dehan, esperensia iha segundu lejislatura la dun iha efetividade servisu tamba komisaun barak, hodi presiza rekursu liuliu asesor atu aselera servisu iha bancada no komisaun.

“Esperensia liu ba kotuk komisaun laiha efetividade, ne’e duni loloos lejislatura agora tenki hatuun,” dehan Branco iha uma fukun PN, kuarta (15/8).

Tuir nia, situasaun ne’e sei la ajuda knaar PN nian hodi fiskaliza servisu hotu ne’ebe ezekutivu halo.

Kestaun maka laiha asesor tekniku hodi fo apoiu, aat liu tan, governu mos la tau atensaun ba relatoriu ne’ebe komisaun hasai,” deklara nia.

Nune’e, Branco dehan, situasaun sei kontinua nafatin ho segundu lejislatura ne’ebe PN ladun halao ninia funsaun loloos nuudar fiskalizador.

Iha fatin hanesan, deputadu Mateus de Jesusu husi Bancada CNRT rekoinese situasaun ne’e, tanba tuir esperensia iha segunda lejislatura komisaun balun la hala’o nia knaar ho diak, tamba ne’e lolos lejislatura agora bele diminui komisaun ne’ebe mak iha.

.