“Lider CNRT Balun Deskontente Ho Desizaun Xanana”

.

Jornal Independente - Tersa-Feira, 07 Agustu 2012

Lider partidu CNRT balun despontadu (kecewa) ho Xanana Gusmao nu’udar Primeiru Ministru indizitadu hodi involve ema independente barak iha estrutura kintu Governu Konstitusional.

Membru Komisaun Politika Nasional (KPN), Maria do Carmo ‘Bisoi’ hatete, nu’udar pesoal nia mos ladun kontenti ho ema independente neebe barak mak tuur iha strutura governu.

“(Figura) balun halo ita tensaun sa’e, tanba nia ba tuur tiha sekretariu, nia familia mak ba halo demonstrasaun hasoru Governu,” dehan Bisoi ba Independente, liu husi via telefone, segunda (06/8).

Maske nune’e, Bisoi dehan, desizaun ne’e kompetensia Primeiru Ministru indizitadu Xanana Gusmao atu nomea ema ne’ebe mak nia fiar atu servisu hamutuk iha periodu tinan lima mai.

“Ami la hola desizaun tanba ida ne’e kompetensia Primeiru Ministru nian,” dehan Bisoi.

Entertantu lider CNRT ne’ebe lakohi publika nia identidade hatete, nia parte ‘kecewa’ tanba estrutura partidu mak servisu maka’as maibe ikus mai ema ne’ebe la servisu ba partidu maka tuur fali iha estrutura Governu.

Ezemplu nia dehan, Jogu Fotebol karik, ekipa CNRT mak sai vensidor maibe ema seluk mak simu taxa.

Entertantu Prezidenti partidu CNRT xanana Gusmao nuudar Primeiru Ministru dizitadu hateten, laos tempo ona atu hanorin politika hodi ukun, maibe atu bele hala’o asaun konkreta ba dezenvolvimentu iha futuru.

.