“ONU Apoiu Loke Justisa Ba Krimi 1999”

.

Jornal Timor Post - Kinta-Feira, 16 Agustu 2012

Organizasaun Nasoens Unidas (ONU), liu husi Sekretariu Jeral Ban Ki-Moon afirma, fo apoiu total atu loke justisa ba prosesu arguidu sira ne’ebe mak uluk involve no organiza krimi seriu iha tinan 1999.

“Autor ba krimi unidade ne’ebe seriu tebes iha Timor Leste sei lori ba justisa, konta hamutuk ho nasoens unidas nia apoiu momentu ida sei to’o,” hateten Ban Ki-Moon liu husi konferensia imprensa ne’ebe hala’o hamutuk ho Prezidenti Republika, Taur Matan Ruak, Kuarta (15/8), iha Palasiu Prezidensial, Aitarak-laran, Dili.

Ban Ki-Moon dehan, nia rasik deskute ona ho Prezidenti Republika durante oras balun nia laran kona ba kestaun ne’e no situasaun Politika iha Timor Leste.

Ban Ki-Moon hateten, nia fiar katak Timor Leste hanesan nasaun soberania atu iha situasaun politika ne’ebe la’o diak presiza iha justisa ne’ebe mak justu ba povu no vitima.

“Situasaun politika sei la lao diak bainhira justisa laiha,” afirma Ban Ki-Moon.

Entertantu, Fundasaun HAK husu ba Sekretariu Jeral Nasoens Unidas Ban Ki-Moon atu konsidera relatoriu CAVR no KVA ne’ebe mak estadu Timor Leste intrega ona ba ONU iha 2005.

“Ami husu atu ONU nafatin fo konsiderasaun hodi hala’o fallow up ba relatoriu ne’e, ne’ebe iha tempu ne’eba Xanana rasik entrega direitamente eis Sekretariu Jeral ONU, Kofi Anan,” afirma Diretur Ezekutivu HAK, Rogerio Viegas Vicente ba Timor Post iha nia servisu fatin Farol, Dili, Kuarta (15/08).

Nia hateten, Sekjer ONU tenke tau nafatin konsiderasaun ba kazu violasaun direitus umanus ne’ebe akontese iha pasadu iha TL, tenki sai nafatin ajenda importante atu bele oinsa bele fo nafatin, fo kontribuisaun atu fasilita prosesu justisa nune’e bele hetan autor sira ne’ebe maka responsablidade.

Nia haktuir, ida ne’e obrigasoens importante husi ONU tanba momentu akontesementu violasaun iha Timor Leste ONU mos hola parte hodi lidera prosesu knsulta popular iha tempu ne’eba.

.