“Polisia Tiru Armindo Seidauk Tama Prizaun Preventiva”

.

Jornal Independente - Sesta-Feira, 03 Agustu 2012

Membru Polisia ne’ebe tiru mate Armindo Pereira Soares (22) iha Hera, to’o ohin loron seidauk tama ba prizaun preventiva, tanba sei iha prosesu investigasaun nia laran. Komandante Polisia servisu Investigasaun Kriminal (SIK), Supertendente Calistro Gonzaga hateten, iha inisiu kedas instituisaun PNTL halo esforsu makaas atu bele tau iha konsiderasaun ba insidente Hera nian.

Ne’e duni, polisia haruka kedas informasaun ba prokurador distritu Dili hodi halo prosesu investigasaun, maibe polisia labele hatama ema ruma iha prizaun preventiva bainhira seidauk hetan mandatu husi Ministeriu Publiku no tribunal.

“Ami pronto atu fasilita, maibe tuir informasaun tutela bolu hela testamunha balun para hetan nia depoimentu ba iha nia prosesu,” dehan calistro, iha Kuartel Jeral PNTL, Kaikoli, Dili (2/8).

Calistro hatutan, prosesu ba kazu ne’e lao dadauk ona no agora hein bainhira mka atu kompleta, polisia investigasaun kriminal sei hala’o hela ezame balistiku ba kilat musan ne’ebe iha hodi halo preparasaun karik husi parte prokurador presiza objetu.

Suspeitu rasik oras ne’e sei hala’o hela hanesan funsaun hanesan seguransa iha komandu Distrital Dili hodi hein kontinuasaun prosesu.

“Ami investiga ona arma ne’ebe mak ita deskonfia polisia uza hodi halo intervensaun iha tempu ne’eba, arma rua ne’ebe mak ami halo, apresiasaun tiha ona,” hateten Calistro.

Nia hatutan, kazu disturbiu ne’ebe mosu iha kapital Dili hafoin kongresu partidu CNRT iha fulan kotuk, komando Distrital Dili mak halao prosesu investigasaun, parte investigasaun nasional

responsabliza deit kazu krime omisidu hanesan matebian Armindo pereira nia.

.