“MS Rekonese Menus Aimoruk”

.

Jornal Nacional Diario - Kuarta-Feira, 24 Abril 2013 

Ministru Saude Sergio Lobo, rekonese katak, durante ne’e ema barak kestiaona kona-ba menus ai-moruk iha Centro Saude no Hospital Nasional Guido Valadares (HNGV) fo impaktu maka’as ba pasiente sira sai moras grave no balun mate tanba atrazu iha prosesu aprovizionamentu. 

Sergio Lobo informa kestaun ne’e ba Jornalista sira iha Palacio prezidensial, Aitarak Laran, Dili, Tersa (23/4), hafoin enkontru ho Prezidenti Republika (PR) Taur Matan Ruak, hodi informa serviso Ministeriu Saude (MS) nian durante ne’e. 

“Agora ema hotu-hotu kestiaona tanba ai-moruk, ne’e duni iha prosesu nia laran mak iha obstaklu oituan ida, rua, atrazu iha ita nia orsamentu, atrazu prosesu de aprovizionamentu maibe agora dezenvolve dadauk ona, ohin (Horseik) aimoruk balun tama dadaun ona,” informa MS Sergio Lobo.

 MS ne’e mos esplika liu tan katak, oras ne’e dadaun funsionariu ne’ebe mak toma konta atu simu importasaun aimoruk ne’e ema nain rua deit, tanba ne’e difikulta tebes, maibe ba oin sei aumenta tan funsionariu atu atende ba aimoruk nian ho diak hodi labele faille tan. 

Alende ne’e, MS Sergio Lobo informa mos kona-ba makina Raio-X nian iha HNGV ne’ebe ladun diak ona maibe to’o oras ne’e seidauk rejolve, tanba makina ne’e la hanesan ho makina sira seluk, nune’e parte saude sei buka makina ida standar hodi troka makina ne’ebe agora kondisaun la dun diak ona. 

“Makina resis nia nia ne’e uluk seidauk iha, estandarizasaun maibe makina ida raio-X nian ba Hospital la hanesan ho makina seluk, tanba ne’e ami seidauk rezolve to’o agora,” dehan nia.

,