“Xanana Asumi Nafatin Kargu MDS”

.

Jornal Timor Post - Sesta-Feira, 17 Agustu 2012

Seidauk iha ema foun mak bele kaer pasta Ministru Defesa no Seguransa (MDS), tanba ne’e, atual Primeiru Ministru Kay Rala Xanana Gusmao assume nafatin kargu refere.

Informasaun ne’e hato’o husi Ministru Prezidensia do Konsellu Ministru, Hermengildo Pereira ‘Agio’ ba Timor Post, kinta (15/8) hafoin akompani delegasaun Sekretariu Jeral ONU, Ban Ki-Moon iha Parlamentu nasional.

“Primeiru Ministru mak sei sai nafatin Ministru defesa no Seguransa, hanesan mos uluk IV Governu Konstitusional no agora nia kontinua kaer pasta ne’e,” dehan agio.

Ministru ne’e hatutan katak, informasaun ne’ebe fo sai ba publiku dehan Ministru defesa seguransa (MDS) sei assume husi Cirilio Critovao (Xefe Departementu intelejensia TL), ne’e nuudar informasaun tuan, no informasaun foun mak kargu ne’e sei assume nafatin husi atual Primeiru Ministru.

Kestiaona kona ba ezijensia eis Ministra Solidaridade Sosial, Maria Domingas Alves ne’ebe husu Primeiru Ministru Xanana Gusmao atu klarifika nia abilidade ne’ebe Prezidenti Republika kestiaona ba publiku, Agio hatan katak, desizaun ne’ebe hola ne’e parte husi prosesu politiku.

Ba kestaun ne’e mos, kuaze semana ida ne’e nia laran, iha reazen maka’as husi sosiedade sivil liu-liu feto Timor Leste, iha organizasaun feto oi-oin mak fo sira nia reazen atu PM Xanana no PR Taur Matan Ruak esplika abilidade saida maka Micato laiha.

Nune’e mos, ultimamente, Micato mos la simu desizaun ultimus momentu atu tau fali nia ba iha kargu MSS, nune’e, iha ninia deklarasaun intrega kargu MSS ba Ministra foun, nia hateten katak, nia la simu desizaun atu ba fali Ministra MSS, Micato mos iha momentu ne’eba hateten katak, nia iha prinsipiu solidaridade ba nia feto maluk Ministra solidaridade social foun, tanba ne’e, nia simu kargu ne’e, maibe hakarak atu PM no PR klarifika sobre laiha abilidade.

.