Maijen Lere: “Situasaun Difisil, Ministru Tenki Brani Desizaun Tamba Ne’e Mak La Tau Micato Ba Ministra Defesa No Seguransa”

.

Jornal Nacional Diario - Sesta-Feira, 17 Agustu 2012

Instituisaun F-FDTL la preokupa ho se-se deit mak sei sai Ministru Defesa no Seguransa (MDS) hodi lidera F-FDTL no PNTL, maibe importante iha situasaun difisil, Ministru ne’e tenki brani ho desizaun.

Lia hirak ne’e hasai husi Xefe Estadu Maior F-FDTL, Maior Jeneral Lere Anan Timur, wainhira komentariu konaba figura MDS ne’ebe sei okupa kargu ne’e.

“Agora labele dehan, tanba de’it ita nia prezidenti dehan katak, Micato la iha avilidade, la iha abvilidade ba militar duni, porque ita military, ita dehan katak, sai MDS tenki ema idake brani, laos situasaun difisil mai rona hau jeneral ne’e, depois kuandu sala hau deit mak sala, hau mos hakarak presiza ema brani,” dehan Maijer Lere ba Jornalista. Tersa (16/8) iha Kuartel jeneral F-FDTL, Fatuhada, Dili.

Maijor Lere mos hatutan tan, Micato ne’ebe hetan nmesaun husi Primeiru Ministru Indizitadu momentu ne’eba mak Xanana Gusmao, to’o agora nia seidauk hatene, se los mak sei sai MDS, tanba posse ba kargu MDS ne’e seidauk hala’o.

“Uluk dehan katak, PM Indizitadu nomeia ita nia inan Micato, maibe ikus mai la iha, ba fali Cirilio Cristovao, iha momentu ne’eba cirilio iha hela rai liur, maibe mos tomada de pose ba kargu ne’e sei pendente hela, bele iha alterasaun, PM ohin bele hanoin ida, aban bele hanoin seluk, entaun tau fali ema seluk mos iha,” dehan Maijer Lere.

Maijen Lere komentan tan katak, ita hotu konfia inan Maria Domingas Alves ‘Micato’ tanba nia mos ema funu nain neebe fo nia esforsu tomak ba ukun rask an, nia bele duni atu kaer pasta ne’e, maibe seidauk to’o tempu.

“MDS bele mais, hau bele dehan 15 anus kuandu hau pasa, Falur sira pasa, ba reforma hodi tau fali feto ida mos laiha problema, Halaken Maijen Lere.

Maijen Lere reforsa tan katak, uluk iha ailaran nia seidauk komanda feto ida hodi halo funu, maibe partisipa iha aktividade seluk, feto barak mak partisipa.

“Ita nia inan feto uluk iha ai laran, Bilo Mali, Bilesa, Birali, sira ne’e terus, maibe sira nunka lori kilat, atu komanda sira, ou tur iha ne’e hodi tiru, hau nunak halo ida ne’e, hau komanada mak mane, hau servisu ho feto mos laran todan hela,” relembra Maijen Lere.

Ho pasta MDS nian ne’ebe seidauk iha, Maijen Lere preokupa oituan ho atividade reuniaun CPLP nivel Ministru Defesa, tamba, iha reuniaun ne’ebe sei halao iha Dili ne’e, Ministru Defesa Timor-Leste mak sei loke sesaun abertura, tan ne’e, Maijen Lere horseik haruka ona nia Xefi Gabinete hodi haruka karta ba PM Xanana Gusmao atu hatene lolos se mak sei halo abertura ba reuniaun ne’e.

.