Bankada FRETILIN Kestiaona: “Prezidenti Parlamentu Nasional Viola Liberdade Espresaun”

.

Jornal Nacional Diario - Tersa-Feira, 14 Agustu 2012

Bancada Opozisaun FRETILIN iha Parlamentu Nasional lamenta tebes ho atetude Presidenti Parlamentu Nasional, Vicente Guterres ne’ebe dehan, nia lakohi lakon tempo atu responde ba kritika ne’ebe la fundamentu husi publiku no opozisaun.

Membru Parlamentu Nasional husi bancada FRETILIN, Francisco Miranda Branco ho ninia kolega Antonino Bianco dehan, nudar Presidenti parlamentu nasional ne’ebe hateten, kritika hotu tenki bazeia ba lei no konstituisaun, ne’e violasaun boot ba konstituisaun ne’ebe garante liberdade espresaun.

“Se hanesan Prezidenti parlamentu hatete, hotu-hotu kritika tenki bazeia ba lei no konstituisaun entaun povu kiik ne’ebe hakarak konteksa ba kestaun ruma nia lakon ona nia direitu, ne’e lalos,” afirma Francisco Branco, ba JNDiario hafoin levanta kestaun ne’e iha plenaria PN, segunda (13/8).

Francisco Branco esplika katak, funsionamentu PN tenke nakloke tan ba kritika, maibe sei hanesan opiniaun husi Prezidenti PN nian, ida ne’e hatudu momos vontade ida atu halakon diskusaun iha nasaun direitu demokratiku.

Basaa, iha nasaun demokratiku, ema hotu livre atu halo espresaun tuir ida-idak nia presepsaun rasik, tanba konstituisaun RDTL mos garantia liberdade espresaun hanesan kontempla iha Konstituisaun artigo 40 no 41.

Francisco Branco mos esplika, prinsipiu demokratico, bainhira sidadaun ida senti hanoin balun la loos tuir nia hanoin, normalmente nia iha hanoin no direitu atu kontra, laos bandu fali ema, se nune’e mak hamate ona prinsipiu liberdade espresaun e komesa hamate ona prosesu democratico iha Timor-Leste.

Ba kestaun ne’e, Francisco Branco konsidera, deklarsaun Prezidenti PN Vicente Guterres, hatudu momos mentalidade ne’ebe mak ladun diak atu kontribui liberdade espresaun iha Timor Leste.

Entertantu, Deputadu Antonino Bianco, liu husi deklarasaun iha plenaria reforsa katak, intervensaun iha kualidade ka laiha kualidade ne’e direitu ema ida-idak nian atu espresa nia hanoin, laos Prezidenti PN Vicente Guterres, foti aan hanesan fali professor hodi hanorin fali ema seluk, atu dehan de’it mos katak, Timor-Leste la presiza professor.

.