“CNRT-PD Rekonese AMP Laiha Kapasidade Reabilita Estrada”

.

Jornal Independente - Tersa-Feira, 14 Agustu 2012

Partidu Demokratiku (PD) no CNRT rekonese Governu anterior Aliansa Maioria Parlamentar (AMP) laiha kapasidade atu reabilita estrada iha kapital Dili.

Deputadu Virgilio Hornay hateten, kondisaun estrada iha kapital Dili ne’ebe balin komesa estraga fali hafoin hetan reabilitasaun.

Ezemplu nia dehan, estrada iha dirasaun Kolmera nian ne’ebe reabilita iha tempu kalan, to’o rai loron estrada ne’e a’at fali ona.

“Estrada iha Kolmera ne’e foin reabilita, mas Alkatraun nakosbu fali ona,” tenik nia iha uma fukun PN, (13/8).

Tuir nia, desizaun ne’e kauza husi desizaun la loos husi Governu ne’ebe fo kompania sira ne’ebe laiha kualifikadu hodi kaer obra.

Nia dehan, governu ida agora presiza muda sistema hodi garante kualidade projeitu ne’ebe mak iha.

Iha fatin hanesan, deputadu CNRT Manuel Guterres hateten, realidade estrada aat ne’e akontese iha fatin barak, liuliu iha kapital Dili ne’ebe hetan reabilitasaun, maibe la kleur aat fila fali.

“Estrada Bairu-ite ne’e hotu hadia la kleur deit kuak fila fali, ne’e la diak ba dezenvolvimentu,” lamenta deputadu Virgilio.

Deputadu Virgilio mos deskonfia, reabilitasaun husi estrada ne’ebe to’o agora paradu ne’e iha buat ruma ne’ebe lao la los entre governu ho kompania.

Ba kestaun ne’e, Prezidenti PN Vicente Guterres hateten, PN nuudar fiskalizador tenke kontrola didiak atu garante duni kualidade.

.