Forma V Governu Konstitusional: “CNRT Konvida Lu-Olo Tama Governu”

.

Jornal Nasional Diario - Kinta-Feira, 02 Agustu 2012

PreZidenti Partidu Frente Revolusionario Timor-Leste Independente (FRETILIN) Francisco Guterres ‘Lu-Olo’ deklara katak, nia simu karta husi lideransa Partidu Conselu Nasional Rekonstrusaun Timorense (CNRT) atu partisipa iha kintu (V) Governu Konstitusional.

“Karta ne’e ba ona, maibe ami sei haree hodi bele azusta ideias hamutuk atu deside, maibe atu partisipa ka la partisipa iha membru Governu nian, hau hakarak atu repete katak so partidu tenki hatene hanesan Prezidenti, Sekretariu Jeral hamutuk ho orgaun sentrais partidu nian hotu tenki hatene,” deklara Prezidenti Partidu FRETILIN

ba Jornalista sira Kuarta (1/8) iha Parlamentu hodi klarifika informasaun kona ba lideransa partidu CNRT haruka karta ba Partidu FRETILIN atu husu partisipa iha kintu (V) Governu.

Bainhira husu kona ba, iha posiblidade Partidu FRETILIN rasik deside hodi responde ba karta refere, Prezidenti lakohi resposta hodi hateten, bainhira iha ona akordu metan-mutin (Hitam di atas putih) iha nia liman mak foin bele koalia, maibe ne’e la’os desizaun.

“Hau seidauk bele hateten ida ne’e, tanba wainhira dehan katak, mutin ni metan iha ona hau nia oin mak ita koalia i pozisaun atu foti desizaun ne’e ikus fali,” dehan eis prezidenti Parlamentu Nasional Francisco Guterres ‘Lu-Olo’.

Prezidenti Partidu FRETILIN ne’e mos afirma tan katak, FRETILIN organizasaun politika partidu ida nian, partidu ida ke ho ninia istoria no forte tebes iha Timor-Leste, tan ne’e kuandu hakarak atu bolu partidu nia ema para atu bele partisipa iha Governu, Partidu tenki konsulta ho nia membru sira, la’os deside nar-naran de’it.

.