Governu Foun Mai Ho Membros 55 “MED Ho SEPE Taka”

.

Jornal Nasional Diario - Kinta-Feira, 02 Agustu 2012

Kintu (V) Governu konstitusional mai ne’e sei iha membros Governu hamutuk 55 inklui Primeiru Ministru no Vice Primeiru Ministru, total membru Governu 55, Ministru iha 15, Vice Ministru 11, Sekretariu Estado 27, Primeiro Ministru no Vice Primeiru Ministru ida.

Estrutura organiku membros governu foun mai ne’e, Primeiro Ministro indijitado, Kay Rala Xanana Gusmao, Kuarta (1/8) horseik aprezenta ba Direktores Nacionais (DN) no Direktores Gerais sira husi kada Ministerios.

Objetivu husi sorumutu ne’e, atu DN no DG sira bele hatene no iha koinesementu klean liu tan oinsa atu halo planu no programa ba orsamentu ninian iha tinan ida ne’e no tinan hirak tuir mai.

Estrutura organiku V Governu konstitusional ne’e la kontempla Ministeriu Ekonomi e Dezenvolvimentu (MED) no Sekretariu Estadu Politika Energetika (SEPE).

Iha oportunidade ne’e, PM Xanana Gusmao esplika katak, Ministeriu Ekonomia no Dezenvolvimentu (MED) no Sekretariu Estadu Politika Energetika (SEPE) sei hasai ka la tama, nune’e rekomenda ba funsionariu sira ne’ebe servisu iha fatin rua ne’e sei entrega ba komisaun funsaun publiku mak sei tau matan direkta no halo realokasaun ba Ministeriu sira ne’ebe mak presiza funsionario.

PM Xanana Gusmao dehan tan, kona ba patrimonia estadu ne’ebe pertenente ba agensia rua ne’e husu atu entrega ba Direksaun Nasional Gestaun Patrimonia Estado atu halo realokasaun ba estrutura foun Governu nian.

Konaba orsamentu ba salariu funsionariu husi MED no SEPE sei sentraliza iha Komisaun Funsaun Publiku (KFP), mak sei responsabliza ba pagamentu sira nia salariu.

Nia mos hatutan tan katak, estrutura Ministeriu no orgaun Estadu ne’ebe mak laiha mudansa mak hanesan, Presidenti Republika, Parlamentu Nasional, Ministeriu Defesa no Seguransa, Ministeriu das Financas no seluk tan.

PM Xanana haktuir tan, iha V Governu konstitusional ne’e mos iha estrutura ne’ebe mak hetan ajustamentu, hanesan iha Gabinete PM, Gabinete Vice PM, ajustamentu ba estruturas ne’ebe mak eziste iha Konselhu Ministru, iha Ministeriu Negosiu Estranjeiru, Ministeriu Justica, no Ministeriu sira ne’ebe existe iha Kuartu Governu ne’e sei hetan hotu azustamentu katak sei aumenta tan sekretariu estado foun para halao servisu ba nasaun ho efektivu.

Maske halo ajustamentu ona ba V Governu Konstitusional no sira orsa ne’e tur hamutuk hela hodi monta individu ne’ebe mak sei assume pasta nuudar Ministru no Sekretariu Estado.

Iha estrutura organico V Governu ne’e maka, Primeiro Ministru, Prezidensia Konsellu Ministru, Vice Primeiru Ministru no Cordenador ba asuntu social, Ministeriu Financas, Ministeriu Negosiu Estranjeiru, Ministeriu Administrasaun Estatal, Ministeriu Justica, Ministeriu Agrikultura, Ministeriu Saude, Ministeriu Edukasaun, Ministeriu Comersia Industria no Ambiente, Ministeriu Solidaridade, Ministeriu Obras Publiku, Ministeriu Transporte no Komunikasaun, Ministeriu Defesa no Seguransa, Ministeriu Energia no Rekursu Naturais, Ministeriu Turismo.

.