KIntu Governu Tenki Servisu Maka’as: “Cirilio La Simu Posse”

.

Jornal Timor Post - Kinta-Feira, 09 Agustu 2012

Prezidenti Republika, Taur Matan Ruak (TMR) husu ba Kintu Governu atu servisu maka’as liu tan hodi realiza mehi, nune’e ultrapasa povu nia moris ba diak.

“Hau husu Primeiru Ministru atu lidera koligasaun kintu Governu ho kondisaun ba koezaun, solidu no estabilidade para avansa ba mehi, nune’e harii estadu diak liu tan no hadiak povu nia moris sai diak liu tan,” Taur dehan ba Jornalista sira iha palasiu Nobre Lahane, Dili, kuarta (8/8), hafoin fo tomada de pose ba membru kintu Governu.

Kona-ba infraestrutura, Prezidenti Republika dehan degradasaun tebes tanba maioria infreestrutura Indonesia husik hela ba estadu maibe, tuir nia, pior liu konstrusaun ne’ebe konstrui husi Timor ona rasik, ne’ebe at liu fali Indonezia nian tam la dun iha kualidade.

Entertantu, Cirilio Jose Cristovao ne’ebe Primeiru Ministru Kay Rala Xanana Gusmao nomea ba kargu Ministru Defesa no Seguransa (MDS), Kuarta (8/8) la simu pose iha Palasiu Nobre. Lahane-Dili.

Maske Diario Timor Post seidauk hatene loloos razaun Cirilio la marka prejensa hodi simu posse ba pasta MDS, maibe tuir informasaun ne’ebe Timor Post hetan katak, Cirilio oras ne’e ba iha rai liur (estranjeiru).

Cirilio antes ne’e, hanesan Xefe departementu Intelejensia Nasional Timor-Leste, ne’ebe hala’o knaar relasaun maka’as ho area Defesa no Seguransa.

Ba pasta MDS, antes ne’e, Xanana rasik nomeia eis Ministra Solidaridade Social, Maria Domingas Alves ‘Micato’, maibe hafoin Xanana aprejenta lista membru Governu ba Prezidenti Republika, mosu fali lista foun ba pasta MDS ho naran Cirilio.

Tuir Observasaun Timor Post, Micato mos la partisipa iha serimonia tomada de pose ba membru kintu (V) Governu, enkuantu observasaun haktuir mos katak, iha serimonia ne’e hetan partisipasaun husi membru IV Governu.

Pasta MDS, hetan preokupasaun boot iha publiku, liu-liu mosu uluk naran Micato, ne’ebe tuir fontes kredibel Timor Post informa katak, lideransa msimu sira iha F-FDTL rasik mak lakonkorda, ho razaun Micato la’os mai husi ema militar, tanba ne’e, lideransa hirak ne’e ezizi ba Prezidenti Republika hodi troka kedas Micato ba Cirilo.

Iha parte seluk mos, fontes kredibel ne’e haktuir, Micato sai preokupasaun boot iha publiku, mos tanba Micato nia laen-kaben, antes ne’e kontra maka’as Xanana rasik.

.