Aniceto Guterres: “FRETILIN Lakohi Lidera Komisaun Parlamentu”

.

Jornal Timor Post - Kuarta-Feira, 08 Agustu 2012

Frente Revolusionario Timor-Leste Independente (FRETILIN) iha uma fukun Parlamentu Nasional, Tersa (07/08), konsidera Kintu Governu kontinua aplika politika eskluzaun hodi la fo fatin ba FRETILIN iha Parlamentu no mos iha Governu, tanba ne’e, FRETILIN desidi lakohi tan lidera komisaun iha parlamentu, tanba la’os nesesidade.

“Ami senti iha eskluidu iha tinan 2007-2012, maibe, ami hatudu nafatin sentidu estadu, ami kolabora nafatin, ami halo opozisaun iha demokratiku, liu-liu kolabora iha Parlamentu, parlamentu durante ne’e funsiona ho diak, tanba ho ami nia prezensa,” Aniceto dehan ba Timor Post iha parlamentu, Tersa (7/8).

Nia dehan, iha tinan 2007, bele komprende tanba foin sai husi situasaun ida krizi nian, maibe, situasaun ida ne’e sei kontinua nafatin iha 2012, FRETILIN kontinua laiha fatin iha Governu no laiha fatin iha meza Parlamentu, tanba ne’e, tenki muda estratezia politika katak, diak liu FRETILIN lalika lidera komisaun.

Maske nune’e, Aniceto sublinha katak, FRETILIN sei partisipa iha komisaun hanesan deputadu hodi hala’o knaar fiskalizasaun no partisipa halo lei.

.