Deputadu Francisco Branco: “FRETILIN Konsidera V Governu Ho Strutura 55 Sei La Fo Benefisiu Ba Povu”

.

Notisia Husi TVTL - Kuarta-Kalan, 08 Agustu 2012

Bancada Opozisaun Fretilin Konsidera estabelese kintu Governu konstitusional ho nia struturas kadeira 55 ne’e sei la fo benefisiu ba Povu Timor-Leste.

Iha parte seluk, segundu vise Prezidenti Parlamentu Nasional afirma primeiru Ministru Kay Rala xanana Gusmao sei hasai povu husi kiak no mukit.

Ohin gabinete Kintu (V) Governu konstitusional hamutuk 55 ofisialmente simu posse husi Prezidenti da Republika Taur Matan Ruak, Estabelesementu gabinete Ministru 15 ne’e, Vise Ministru 12 no Sekretariu Estadu 26 kontinua hamosu pro no kontra tamba Bancada FRETILIN konsidera estrutura refere sei la fo benefisiu ba povu Timor-Leste.

“Hadook husi desizaun atu rejolve povu nia moris, tamba IV Governu konstitusional hatudu ona esperensia katak, maske numeru la dun boot hanesan agora dadaun, sei la konsege rejolve povu nia moris, maibe agora ita haree kontrariu, sira harii elite oan ida ne’ebe iha benefisiu hotu-hotu, husi orsamentu estadu ne’ebe mai husi ponte ida mesak, husi ita nia rikusoin husi minarai,” dehan Francisco Branco.

Iha Parte seluk, segundu vice Prezidenti Parlamentu nasional Aderito Hugo hateten, nia optimista ho lideransa Kay Rala Xanana Gusmao nian, sei la husik povu atu moris iha mukit nia laran, tamba kintu Governu konstitusional ne’e rasik sei refleta ba planu Estratejiku Dezenvolvimentu Nasional (PEDN).

Strutura Kintu (V) Governu konstitusional sei hahu nia knaar iha Kinta-feira ne’e.

.