“Movimentu Feto Kontra Deklarasaun PR Taur Matan Ruak Tamba Kontra Konstituisaun Artigu 16, 17 no Artigu 63”

.

Notisia Husi TVTL - Kuarta-Kalan, 08 Agustu 2012

Movimentu Feto Timor-Leste la konkorda ho deklarasaun Prezidenti da Republika Taur Matan Ruak ne’ebe publika iha Jornal balun hodi hateten, Maria Domingas Alves ‘Micato’ laiha abilidade hodi assume kna’ar hanesan Ministra Defesa no Seguransa.

Movimentu Feto Timor Leste fiar katak, Maria Domingas Alves iha kapasidade hodi hola parte iha prosesu dezenvolvimentu iha Timor Leste.

Liu husi konferensia da imprensa, Diretora ezekutiva Rede Feto Jacinta Luzinha kontra deklarasaun ne’ebe hato’o husi Prezidenti Taur Matan Ruak iha Jornal balun edisaun 6 de Agustu 2012.

“Stetmentu Prezidenti da Republika hatudu minimizasaun sistimatikamente ka terik partisipasaun no envolvimentu direta feto nian iha formasaun Governu Politika no implementasaun politika atu lidera no kaer Ministeriu Publiku iha Governu, sistimatikamente Prezidenti da Republika depropositu ho konsensia rasik hakarak amate ka oho karakter pesoal ka ‘Pembunuhan Karakter’ no ignora feto nia kapasidade hodi hamosu opiniaun publiku ne’ebe hatudu katak, feto laiha kapasidade atu lidera instituisaun hanesan Defeza e Seguransa,” deklara Jacinta.

“Senor Primeiru Ministru (PM) tenki klarifika ba publiku, razaun saida, Motivasaun saida, nia tau tiha ona Pasta ba ema sira ne’ebe maka refere, serake nia (PM) konsulta ona Senor Prezidenti da Republika para atu labele asai lista ne’e antes, hodi labele kestiaona oioin hanesan ne’e, ida ne’e mak movimentu feto no rede feto tomak ami hakarak husu esklaresementu ba defensores politiku sira, liu-liu ba Prezidenti da Republika ho Primeiru Ministru atu esklarese ba publiku,” dehan reprejetante feto.

Jacinta Luzinha hateten, desizaun Prezidenti nian hodi kansela Maria Domingas Alves ‘Micato’ atu kaer pasta nuudar Ministra Defesa no Seguransa hanesan diskriminasaun ba feto kombatente.

“Hanesan feto kombatente ida, Senora Maria Domingas Alves ‘Micato’ nia integridade no kompetensia atu salva giarda soberania iha nasaun ida ne’e, kansela pozisaun Ministra Defesa Seguransa ba Senora Maria Domingas Alves, signifika, ne’e nega no ignora integridade no kompetensia feto kombatante ida nian,” deklara Jacinta.

Rede Feto mos konsidera deklarasaun Prezidenti da Republika ne’e Viola konstituisaun RDTL artigu 16, 17 no artigu 63 ne’ebe koalia kona ba igualidade no direitu atu assume kargu ruma.

.