Luta Hamutuk: “V Governu Konstitusional Aplika Sistema Oligarkia”

.

Notisia Husi TVTL - Kuarta-Kalan, 08 Agustu 2012

ONG Luta Hamutuk (LH) husu ba Governu foun atu labele repete failansu ne’ebe akontese iha IV Governu Konstitusional.

Luta Hamutuk nota katak, Ministeriu no Sekretariu Estadu balun faille tamba lakonsege jere no kordena servisu iha terenu.

Relasinadu ho Governasaun foun ba periodu tinan 2012 to’o 2017 ne’ebe kompostu husi Ministru 15, Vise Ministru 12 no Sekretariu Estadu hamutuk 28, kompara ho Strutura IV Governu Konstitusional iha mudansa signifikante tebetebes.

Diretur Luta Hamutuk rekomenda ba Kintu (V) Governu konstitusional atu labele repete eirus kona ba estabelesementu no dezenvolvimentu Ministeriu ka Sekretariu Estadu ida.

“Estabelese Sekretariu Estadu ida, Ita sobu fali, ita taka fali, ita halo fali foun ba estadu ninia ekipa sira, ne’ebe durante ne’e hetan ona fasilidade, hetan ona treinamentu ita gasta ona tempu derepenti taka, ida ne’e mos ladun diak, hanesan ita hatene, Sekretariu estadu Energitika no Ministeriu Ekonomia Dezenvolvimentu taka tiha,” dehan Mericio Akara.

Luta Hamutuk mos haree mosu maun alin iha Governu foun bele hamosu espetativa negativu husi publiku ba formasaun Governu foun, maske ida ne’e direitu husi Primeiru Ministru.

“Iha naran kuaze ema nain 6 mak maun alin, ida ne’e la dun diak, se Ministru nain 6 hanesan ne’e maun alin, ne’e ema bele hanoin katak, ne’e aplika ona sitema oligarki, sitema oligarki ne’e dehan katak, Familia ida mak domina iha Governasaun,” dehan tan Mericio Akara.

Mericio Akara afirma mosu inkapasidade husi Ministru no Sekretariu estadu atu jere no koordena ba nia servisu, tamba ema ne’ebe hili laiha beckgaround ho pozisaun ne’ebe nia okupa, tamba ne’e Luta Hamutuk sujere atu governu atu rekruta profesionais Timoroan atu bele servisu ho diak iha Ministerius.

.