“OJE Sulin De’it Ba Bolsu”

.

Jornal Timor Post - Kinta-Feira, 09 Agustu 2012

Orsamentu Jeral Estadu (OJE) ne’ebe ezekuta, hahu agora ba oin sei gasta barak liu ba salariu membru Governu atual, tanba realidade hatudu numeru membru Governu kontinua aumenta to’o nain 55.

“Hau preokupa liu kuandu lei pensaun vitalisia la altera maka implikasaun ba orsamentu kada tinan 5, katak, sei fo todan ba nasaun,” dehan Diretur Judisial Sistem Monitoring Programe (JSMP), Luis

Oliveira Sampaio dehan ba Jornalista sira iha nia knar fatin, kuarta horseik.

Nia hatutan, estrutura ne’ebe boot sei obriga estadu selu membru Governu kada tinan no wainhira membru governu sira remata mandatu sei goza tan diretu eis titular.

“Hau haree, estrutura ne’ebe bo’ot hatudu laiha efetividade, kestaun la’os tenke koloka ema iha area hotu, maibe presiza haree moos ba gastu orsamentu estadu nian kada tinan,” Sampaio akresenta.

Preokupasaun hanesan mos antes ne’e, hato’o husi Deputadu bancada FRETILIN balun katak, ho numeru membru Governu ne’ebe barak sei gasta de’it orsamentu estadu nian barak liu, rezultadu maka ikus liu servisu

sei la lao ba oin.

.