PR Taur Husu Ba V Governu Atu Luta Hasoru Kiak: “Dotor Cirilio Sei Asume Kargu Ministru Defesa No Seguransa”

,

Notisia Husi TVTL - Kinta-Kalan, 09 Agustu 2012

Prezidenti da Republika Taur Matan Ruak husu ba entidades tomak atu luta hasoru kiak no mukit.

Xefe Estadu hato’o kestaun ne’e hafoin fo tomada de pose ba membru Kintu (V) Governu konstitusional iha Palasiu Nobre lahane, Dili.

Prezidenti da Republika Taur Matan Ruak hato’o deklarasaun ne’e ba TVTL hafoin remata serimonia Tomada de posse ba kintu Governu Konstitusional.

Prezidenti da Republika mos husu ba Governu foun atu kumpri nia misaun atu servi ba povu Timor-Leste.

“Esperansa mak ikus liu atu mate, tamba ne’e iha haun nia deskursu ohin hau hateten, hau konta problema barak iha ita nia rain, dezafiu agora halo nusa mak ita hetan solusaun ba problema sira ne’e hodi hakat ba oin, hau laiha estatistika ida, valor ira maka tinan-tinan gasta deit ba ihaMinistru, Vice Ministru no Sekretariu estadu sira ne’e, maibe hau bele dehan, importante mak sira tenki kumpri misaun ne’ebe fo ba sira, paraque entre kustu ba benefisiu, it abele hetan benefisiu barak liu ba ita nia sidadaun duke buat ne’ebe ita gasta ba sira.

Kiak somenus kuandu ita servisu maka’as, la para, beibeik, hau fiaR ita bele, so ita bele, se kuandu ita tuir planu ida, la para, beibeik ho kualidade,” dehan Taur matan Ruak.

Xefe Estadu mos ezizi ba membru Governu atu luta hodi hamenus kiak no mukit iha Timor Leste.

“Atu hasai kiak, ne’e funu foun, ita uluk manan ona funu, kiak ita tenki maman iha tempu agora, kuandu ita la manan, ne’e dehan, ita la halo, hanesan Prezidenti, hanesan Timor oan hau fiar ita sei hakat liu ida ne’e,” dehan Taur Matan Ruak.

Kona ba pozisaun Ministru defesa no seguransa ne’ebe seidauk simu posse, Xefe do Estado hateten, Cirilio Kristovo sei assume kargu refere no sei hala’o tomada de posse iha tempu badak.

“Ministru Defesa Dotor Cirilio, nia laiha iha ne’e, mais nia sei mai hikus e sei toma posse,” haklaken Taur Matan Ruak.

Prezidenti da Republika Taur Matan Ruak mos ezizi ba Kintu Governu konstitusional atu fo atensaun ba seitor edukasaun, saude, reforma administrasaun publika no mos infra-estrutura hodi alkansa dezenvolvimentu ne’ebe sustentavel ba povu Timor Leste.

.