PR Taur Matan Ruak: “Governu Tenki Esforsu Povu Nia Moris”

.

Jornal Nasional Diario - Kinta-Feira, 09 Agustu 2012

Prezidenti Republika (PR) Taur Matan Ruak husu ba Governu foun ne’ebe simu ona posse atu esfrosu-an makaas par abele hadia povu nia moris ne’e sai diak liu tan, tanba durante ne’e problema barak maka povu sei hasoru.

“Ita haree dezafiu barak loos, ita nia povu hein ita para que ajuda sira ultra passa, dezafiu no obstaklu sira ne’ebe afeta sira nia moris no sira nia futuru,” hateten Xefi Estadu maijor Jeneral Taur Matan Ruak iha nia diskursu hafoin fo pose ba estrutura membru V Governu Konstitusional iha salaun Nobre Lahane, Dili, Kuarta (08/08).

Taur Matan Ruak hateten katak, pronto koopera ho V Governu konstitusional, Parlamentu, sosiedade sivil sira hotu atu buka solusaun ba problema sira ne’ebe mak durante ne’e povu infrenta iha sira nia moris loro-loron.

“Prezidenti da Republika disponivel para kontinua koopera ho V Governu Konstitusional, Parlamentu, Sosiedade tomak para buka solusaun ba problema sira ne’ebe afeta ba nasaun, liuliu vida moris ita nia sidadaun sira nian,” Taur Matan Ruak haklaken.

Taur matan Ruak mos informa tan, setor produtiva frazil teb-tebes tanba laiha kapasidade, inklui seitor agrikultura ne’ebe mak halo duni dezenvolvimentu durante tinan 10 maibe to’o oras ne’e kontinua importa ai-han mai husi rai liur.

Taur Matan Ruak mos kestiaona kona ba infra-estrutura, tanba to’o ohin loron kondisaun estrada ne’ebe Indonesia halo no husik hele ho kualidade, maibe estrada ne’ebe Timor oan halo ne’e la ho kualidade no aat mos lais liu.

“Infra-estrutura degradasaun aseleradu tebe-tebes, oituan ne’ebe Indonesia sira husik hela iha ita nia rai ne’e at lais loos, mais pior liu oituan, ne’ebe ita halo aat lais liu fali kompara ho ida ne’ebe Indonesia halo husi hela ba ita,” tenik nia.

Marka prezensa iha serimonia tomada de posse ne’e mak hanesan, Eis Prezidenti da Republika Jose Ramos Horta, Bispo Diocese Dili, Dom Alberto Ricardo da silva, Reprejetante Bispo Dioseze Baucau no Maliana, Prokurador Jerald a Republika (PJR) Ana Pesoa, Reprejetante Prezidenti Tribunal Rekursu, Xefi Estadu Maijor jeneral Lere Anan Timur, Komandante Jeral PNTL, Konfisoens relijiosu, membru Parlamentu III lejislatura, korpus diplomatikus iha TL, sosiedade sivil inklui mos familias membru governu foun no mos konvidadus sira seluk.

.