Governu sei lori fila Timoroan ne’ebe terus iha Portugal

Timor Post – Jaime Pires

DILI(timorpost.com)- Governu Timor-Leste sei servidu hamutuk ho Governi Portugal hodi bele lori fila hotu sidadaun Timoroan sira ne’ebe ba terus iha ne’eba inklui seidauk hetan servisu iha Portugal.

“Sim, timoroan iha Portugal agora 5000 mil, maibe sira enfrenta problema ne’e hamutuk 700 to’o 800 de’it, problema tanba la hetan servisu no laiha hela fatin,” dehan Ministra Negosiu Estranjeiru no Kooperasaun, Adalhiza Magno, iha Palasiu Governu, Tersa (25/10).

Nia dehan, iha semana kotul Konsellu Ministrus aprova ona medida emerjensia hodi bele ajuda timoroan sira ne’ebe sei enfrenta problema iha Portugal.

“Depois parte Portugal mos tenta kolabora ho ita atu bele oinsa hamenus timoroan sira ne’ebe atu ba, ne’ebe buka dalan hela oinsa atu halo ida ne’e,” deklara nia. 

Entaun kuandu sira voluntariu atu fila tanba susar atu hetan servisu, Governo Timor-Leste sei ajuda sira hodi lori fila sira mai Timor-Leste.

“Kuandu atu deporta entaun sira ida kaer atu deporta sira fila ne’e mak sei responsabilidade atu bele lori sira mai iha Timor-Leste”, deklara Ministra.

Tanba ne’e Governu Timor-Leste konkorda ona atu halo kolaborasaun ho parte Portugal hodi bele tau matan ka hamenus ema sira ne’ebe ba Portugal laiha garantia servisu.

“Depois mos sei suporta ho medidas sira balun hodi bele halo sira hetan servisu no moris diak liutan, maibe susar atu hetan servisu Governu prontu atu bele lori fila sira”, Adalgiza sublina. 

Atu hakotu nia dehan, ho ida Xefe Estadu José Ramos Horta, sei hamutuk ho membru Governu balun iha tempu badak iha Portugal hodi koalia asuntu sira ne’e, nune’e mos bele buka dalan oinsa timoroan sira iha ne’eba bele hetan servisu.

Foto, Facebook.