Arsénio Bano Planu Rekruta Tripulante Ró Haksolok

 Timor Post - Jaime Pires

DILI (timorpost.com)–Prezidente Autoridade Rejiaun Administrativa Espesiál Oé-Kusi Ambenu (RAEOA), Arsénio Bano, hatete sira planu ona atu halo rekrutamentu ba Tripulante hodi loro Ró Haksolok.

“Ohin ha’u enkontru ho Primeiru Ministru, atu hato’o relatóriu kona-ba ha’u-nia vizita ba Portugál ne’e hodi haree estaleiru no Ró Haksolok, agora estaleiru ne’e prontu tiha ona, no agora atu hahú halo rekuperasaun ba Ró Haksolok,” nia hateten, hafoin hasoru Xefe Governu, iha Faról, Segunda (17/10).

Nia dehan, sira-nia vizita ne’e mós simu rekomendasaun husi parte seluk atu hadi’a sira-nia Ró iha estaleiru refere no mós balun atu halo investimentu seluk, ne’ebé sasán sira ne’e agora la’o di’ak hela.

“Sei prepara timoroan sira, ami sei halo rekrutamentu atu fó formasaun ba tripulasaun no mós konstrusaun Navios, atu nune’e ema sira ne’e iha esperiénsia aban- bainrua ita harii estaleiru iha Timor-Leste, karik sira bele servisu,” deklara nia.

Nia reforsa, ida ne’e sei halo iha tinan ida ne’e nia laran, atu nune’e ema sira ne’ebé Rekruta atu fó formasaun ne’e sira bele hetan esperiénsia.

“Ba Tripulasaun ne’e depois kuandu Ró Haksolok ne’e hotu lori mai Timor-Leste, ita- nia ema iha ona esperiénsia hodi kaer rasik ita-nia Ró ida ne’e,” Bano informa.

Atu hakotu nia dehan, kona-ba notísia média balun fó sai dehan, OJE 2023 RAEOA husu tan osan millaun 16.000 USD ba Ró Haksolok ne’e la loos no falsu, tanba OJE 2023 ne’e sira la husu osan ba Ró Haksolok. Maibé osan uluk millaun 14 USD ne’e mak sira jere to’o agora.