CAC Kontinua Ezekuta Mandadu TDD, Halo Buska no Aprensaun ba Ministru MAPKOMS

Comissão Anti Corrupção CAC Timor-Leste - Facebook

Farol - Comissão Anti-Corrupção (CAC) liu husi ekipa investigadór segunda-feira (17/10) ohin ezekuta mandadu Tribunal Distritál Dili nian rezultadu primeiru interogatóriu ba arguidu nain rua nian ne'ebe CAC kaptura no detein iha semana kotuk hodi hala’o operasaun buska no aprensaun kontinua ba Ministru Asuntu Parlamentar no Komunikasaun Sosiál (MAPCOMS) relasiona ho kazu instalasaun set-top box RTTL, EP.

Ekipa investigadór sira ezekuta mandadu buska no aprensaun ba Ministru MAPKOMS ne’e hodi halo auto inkeritu tanba iha indikasaun nu’udar autór prinsipál iha kazu instalasaun set-top box RTTL, EP ne’ebé indika rezulta prezuizu boot ba Estadu.

Mandadu buska no aprensaun ne’e Tribunal Distritál Dili hatun mai iha Orgaun Polisiál Espesializada CAC hafoin termina priemira interogatóriu ba arguidu na’in rua ho inisiál GFC e de GM no MdSFC iha TDD iha sabadu no domingo semana kotuk.

Iha operasaun ohin loron, ekipa investigadór sira hala’o buska aprensaun iha fatin tolu diferente; edifisiu Gabinte MAPKOMS, edifisiu FFTL no rezidénsia Ministru MAPKOMS nian iha kapitál Liquica.

Iha operasaun buska no aprensaun ne’e, ekipa invetigadór sira rekolla objetu krime sira relasiona ho dokumentu no evidensia komprovativu sira ne’ebé pertense ba Ministru nian.

Hafoin operasaun buska no aprensaun, ekipa investigadór ne’ebé hetan apóiu husi Polisia Nasionál Servisu Investigasaun Kriminál (PNSIK) lori Ministru MAPKOMS mai iha CAC Farol Dili hodi kontinua halo identifikasaun no hakle’an prosesu investigasaun ba kazu refere.

Nune’e mós hafoin halo identifikasaun ba Ministru MAPKOMS, Komisaun sei hakle’an análize ba objetu krime sira antes remesa ba Minstériu Públiku hodi fó kontinuidade ba prosesu sira seluk. 

“Presiza halo identifikasaun, e depois prosesu ne’e tenke la’o kontinuasaun, halo análiza ba dokumentu sira, ba prova hotu-hotu ne’ebé iha. Se iha nesesariu ita lori nafatin ba oin”, Katak Komisariu Sergio.

Foto, CAC, Facebook