Taur sei fiar nafatin ninia membru governu iha kazu 130 mil dollares ke autoridade konfiska

Timor Hau Nian Doben

Primeiru-ministru, Taur Matan Ruak, dehan ohin ba jornalistas sira katak sei fo’o fiar nafatin ba ninia membru iha governu ke halo intervensaun ba Servisu Nasional Intelijensia tanba presunsaun inosensia nian.

Ba jornalista sira, Primeiru-ministru (PM) dehan katak, “ konserteza ke hau mantein konfiansa ba hau nia membro governu sira, no iha prinsipiu ida naran presunsaun da inosensia no ita iha tribunais ba deside”.

Kona ba surat ke vise-ministru haruka ba Komandante Jeral Polisia Nasional Timor Leste (PNTL) hodi husi demissaun Gastao Almeida nian, Xefe Governu dehan katak nia “ la iha konesimento no tanba ida ne’e lakohi halo komentariu".

Maske PM dehan katak la iha konesimentu kona ba surat ke sira ninia Vises-Ministrus haruka ba PNTL, Komissariu polisia, Mateus Fernandes, fo’o sai ba media katak Vise-ministru nain tolu haruka duni surat ba komando polisial  hodi fo’o informasaun kona ba hahalok investigador Servisu Nasional Intelijensia nian, Gastão Piedade.

Sirkula informasaun iha comunidade nia leet katak Vise-ministrus hakarak “vinga” Gastão Piedade no hakarak eziji ninia demissaun tanba ninia lakohi fo’o fila fali osan Naimori nian, 130 mil dollar ke autoridade konfiska  iha Aeroporto Dili, osan ida ne’e nia destinu maka Indonezia no to’o ohin loron la hatene osan mai hosi ne’ebe no tanba saída maka atu lori ba Indonezia. Deskonfia katak "Naimori hakarak fase osan" tanba iha alegasaun balun katak osan ida ne'e osan ilegal, mai hosi kobransa ilegal nomos jogus ilegal.

Tuir Timor-Leste nia lei osan boot liu dez mil dollares se hakarak lori ba rai liur tenki halo deklarasaun ida ba autoridade kompetente sira.