Autonomia Domina F-FDTL; “Lere Promete Muda Sistema Rekrutamentu”

.

Jornal Timor Post - Segunda, 26 Novembru 2012 

Xefi Estadu Maior FALINTIL-Forsa Defeza Timor-Leste (F-FDTL), Major Jeneral Lere Anan Timor promete sei muda sistema rekrutamentu ba membru F-FDTL, atu nune’e autonomia nia oan sira labele kontinua okupa fatin iha instituisaun F-FDTL. 

Lere rekoinese, sistema rekrutamentu ba membrus F-FDTL foun iha tinan kotuk liu ba kontinua nafatin failansu, tanba lakonsege identifika lolos otonomia nia oan sira. 

“Hau mak sala, maibe hau promete ba imi tinan oin sei la akontese tan failansu sira hanesan ne’e,” Maijen Lere koalia ba diario Timor Post, hafoin partisipa iha serimonia intrega sertifikadu ba organizasaun sagrada Familia iha Suku Vila-Verde Dili, Sabado (24/11). 

 Lere rekoinese iha forsa F-FDTL nia laran, nia Major ida, ninia inan aman Milisia no oras ne’e iha Kupang no povu barak kestiaona atu la bele promove nian, maibe tamba nia maka komanda entaun nia kontinua hetan promosaun diviza. 

 “Sala sira ne’ebe mak mosu iha pasadu sei la akontese tan iha futuru, Ba oin hau sei forma ekipa rekrutamentu ida ne’ebe profesionais par abele halo investigasaun klean molok atu simu dokumentus husi kandidatu sira,” promete Lere.

.