“OJE 2013, Governu Sei Propoen US$ 1.2 Billoens”

.

Jornal Nacional Diario - Sesta-feira, 09 Novembru 2012 

Diretor Jeral Ministeriu Finansas (MF) Antonio Freitas informa katak, tuir Planu Orsamentu jeral Astadu (2013), Governu Sei Propoen US$ 1.2 Billoens. 

Antonio Freitas informa asuntu ne’e ba Jornal Nacional Diario iha Edifisiu Institutu Nasional Administrasaun Publiku (INAP), Comoro Dili, Kuarta (07/11). Antonio Freitas hatutan katak, pakote fiskal tinan 2013 nian ne’e, Governu sei aprezenta ba Parlamentu Nasional iha dia 6 de Dezembru 2012. 

“Iha dia 6 dezembru, Governu sei submete orsamentu 2013 ba Parlamentu Nasional, orsamentu ne’e mak iha U$ 1.2 biloens, mas pakote fiskal ne’e normalmente bele liu ida ne’e, depende ba debate iha Parlamentu Nasional,” dehan Antonio Freitas. 

Nia fundamenta katak, tinan ida ne’e, Governu sei la haree de’it ba orsamentu maibe haree mos ba planu tinan lima nian. Ho ida ne’e, Antonio Freitas informa katak, planeamentu ne’ebe mak governu hala’o ne’e mos rigrozu (Ketat) liu. 

 “Planeamentu ne’ebe mak Governu hala’o ne’e ‘ketat sekali’ i la’os haree deit ba orsamentu maibe hare ba buat rua, planu annual governu nian no planu tinan lima governu nian, ne’ebe membru governu ida-idak tenki tuir prioridade governu nian,” hateten Antonio Freitas. 

Antonio Freitas reforsa tan katak, prioridade Governu nian maka konsentra liu ba oinsa haree konaba jestaun ka kapital humanu, saude, edukasaun, agrikultura, infra-estrutura, lei no orden. 

.