Bancada CNRT Rekoinese Projeitu Konstrusaun Kompania Fahe Prosentu Ba Malu

.

Notisia Husi TVTL - Segunda-Kalan, 26 Novembru 2012 

“Deputadu FRETILIN: Problema Ne’e Mosu Tamba Falta Kontrolu Husi Ministeriu Obras Publiku” 

Deputadu Parlamentu Nasional la menta no kestiaona kona ba kualidade projeitu ne’ebe oras ne’e dadaun hala’o iha Timor Leste. 

Tuir pontu de vista husi membrus deputadu sira nota katak, konstrusaun barak ne’ebe hala’o laiha kualidade, tamba kompania tenki fahe porsentu ba malu. 

 Relasiona ho projeitu ne’ebe hala’o iha Timor Leste, tuir deputadu iha uma fukun Parlamentu Nasional hare katak, projeitu barak maka komunidade kestiaona tamba laiha kualidade. 

Tuir informasaun ne’ebe deputadu Sezar de Jejus husi bancada CNRT katak, projeitu laiha kualidade tamba kompania tenki fahe porsentu ba ema ne’ebe fo projeitu. 

“Buat ida ezizi kualidade projeitu ne’e laos buat foun, Povu Timor tomak mos preokupa ho kualidade, maibe dala ruma ita rona sira koko husu porsentu husi kompania, husi ejensia sira ne’ebe maka atu responsabliza prjeitu sira ne’e, se sira husu nune’e halo nusa maka kompania garantia kualidade, kompania la bele garantia ona, tamba osan metade nia fo tiha ona porsentu,” dehan deputadu CNRT ne’e. 

Iha fatin hanesan deputadu Estanislau da Silva hateten, projeitu balun laiha kualidade tamba laiha sipervizaun ne’ebe diak no pagamentu avansadu dala barak la selu. 

“Projeitu kona ba kualidade ne’e problema boot iha ita nia rain, foin dadauk ami audensia ho Ministru Obras Publika, Ministru rasik hateten, BOQ laos Ministeriu mak halo maibe emprejariu sira maka halo, se Emprejariu mak halo BOQ depois laiha kontrolu diak, konserteza sei la tuir planu Ministeriu das Obras publiku nian,” dehan Estanislau. 

Iha plenaria ne’e mos, deputadu sira kestiaona kona ba falta bee moos, eletrisidade kontinua mate, problema trabaladores rai laran, problema Foketis kontinua tarotu iha bairo-bairo, problema seguransa no seluk-seluk tan.

.