“Osan Tratamentu Saude Ba Deputadu Rihun U$4 Kada Tinan”

.

Jornal Independente - Sesta-feira, 23 Novembru 2012 

Parlamentu Nasional (PN) kinta (22/11), aprova proposta orsamentu jeral estadu ba PN tinan 2013 ho valor rihun $4 dolar Amerikanu hodi halo tratamentu saude ba kada deputadu durante tinan ida. 

Proposta numeru 12 aumenta orsamentu tratamentu saude deputadus sira ne’e propoin husi proponente Natalino dos santos ho proponente seluk tanba iha segundu lejislatura aprova rihun $2 durante tinan ida ba kada deputadu. 

Proposta ne’e konsege hetan aprovasaun maske iha debate plenaria mosu pro no kontra maka’as husi deputadu sira ho votus afavor 30, konta 1 no abstensaun 9. 

Durante diskusaun deputadu husi Bancada CNRT, Natalino dos santos hateten, aumenta montante orsamentu ne’e akontese iha segundu lejislatura. 

Nia dehan, orsamentu rihun $2 la sufisiente ba deputadu sira hodi halo tratamentu saude ba kada tinan ida. Maibe Deputada Maria Anjelica sente triste ho proposta orsamentu ne’e, tanba povu barak maka sei moris iha linha kiak no mukit. 

“Bah au nia pesoal tristeza boot ida ba ita, bainhira ita halo komparasaun ho povu kiik sira,” dehan Maria Anjelica iha Plenaria Parlamentu Nasional (22/11). 

Nune’e mos, deputadu Aurelio Freitas husi Bancada FRETILIN la konkorda ho proposta numeru 12 ne’e tanba povu kiik sira seidauk asesu asistensia saude ne’ebe diak. 

Pior liu tan, tuir nia, povu kiik sira mak sosa mina ba ense ambulansia bainhira evakua ba sentru saude hodi hetan tratamentu saude. 

Nune’e, Prezidenti parlamentu Nasional Vicente Guterres dehan, husu ba deputadu sira atu relata informasaun ba Parlamentu nasional bainhira hetan problema saude ne’ebe grave no presiza atu hetan tratamentu saude.

.