“SEAS Halo Promesa Falsu Ba Povu”

.

Jornal Timor Post - Kinta-feira, 29 Novembru 2012 

Sekretariu Estadu Agua e Saneamentu (SEAS) Elias Monis iha nia tomada de pose promete ona ba publiku katak, durante servisu loron 100 nia laran sei rejolve problema bee moos, maibe realidade to’o agora numeru problema bee moos aumenta ba beibeik. 

Gabriel Soares komunidade merkadu Taibesi ne’ebe durante ne’e kuru bee iha mota Taibesi haktuir katak, Sekretariu Estadu Agua e saneamentu (SEAS) depois de simu pose promete buat barak ba povu, maibe realidade hatudu servisu liu ona loron 100 mos problema bee moss povu hasoru nafatin. 

Nia hela iha Merkadu taibesi maibe loro-loron tenki ba haksesuk malu hodi hetan bee mos iha mota taibesi, uluk sira nia bee moos iha maibe foin fulan 6 ba kotuk bee maran to’o ohin loron. 

 “Sorete kanu kuak ida iha mota laran ne’e, se lae ami araska atu ba buka lerek bee mos iha ne’ebe, ita nia governu promete bosok deit baa mi katak, tempu badak sei rejolve mais rezultadu laiha,” dehan nia ba Timor Post, kinta semana liu ba iha mota Taibesi. 

 Gabriel mos husu ba governu atu labele promete bosok deit iha leten, maibe presiza hadia povu nia moris ho problema bee moos ne’ebe povu infrenta iha baze, tanba se ukun nain sia tur nonok mak promete deit, povu maka sei kontinua sofre ba problema bee moos. 

Tuir observasaun diariu ne’e, aleinde problema bee moos iha taibesi, komunidade sira iha area Becusse kraik, Becora nu’u laran mos kada loron tenki ba lalin bee ho distansia ne’ebe dok.

.