Loron 100 V Governu Konstitusional “Korrupsaun Komesa Moris”

.

Jornal Nacional Diario - Kuarta, 21 Novembru 2012 

Organizasaun naun Govermental konsidera V Governu Konstitusional tama ona loron 100 governasaun nian ne’e, korupsaun komesa moris ona no mos membrus governu balun laiha performace diak. 

ONG Lalenok ba Ema Hotu (LABEH) detekta ona embreo korupsaun komesa moris ona iha Governu Bloku Koligasaun (GBK) ne’ebe mak foin kompleta nia servisu loron 100. 

LABEH nuudar organizasaun Naun Govermental (ONG) ne’ebe servisu iha area Luta hasoru Korupsaun, Kolusaun no Nepotizmu no promove transparansia, akuntabilidade, Boa Governasaun, hakarak kongratula serviso loron 100 V Governu Konstitusional ne’ebe maka hahu husi loron 8 Agusto 2012 to’o loron 16 Novembru 2012. 

Tuir LABEH nia observasaun katak, obstaklu boot ne’ebe V Governu konstitusional bele hasoru maka bele lakon kontrola ba membrus gabineti balun, funsionario, diretores ne’ebe hahu ona halo korupsaun kiik oan, LABEH hahu identifika ona korupsaun kiik oan sira ne’ebe komesa akontese iha governu ida ne’e, liu-liu prosesu vizita ba distritu no iha rai laran. 

Liu husi konferensia imprensa ne’ebe halao iha edifisiu LABEH, Comoro, Dili, Tersa (20/11), Cristopher Henry Samsom klarifika katak, tuir monitorizasaun ekipa taks force LABEH nian iha terenu identifika katak, funsionariu balun ne’ebe mak la ba halo serviso iha Distritu no tur deit iha Dili, maibe sira nia naran tama hotu iha lista MOP nian hodi simu perdiem husi orsamentu estadu nian. 

 LABEH mos identifika katak, iha balun ne’ebe mak ba distritu loron ida deit, maibe tau fali loron rua ka balun ne’ebe ba halo serviso iha distritu loron rua, sira aumenta ba loron lima nian. Ho embreo korupsaun ne’ebe komesa moris ona iha V Governu konstitusional ne’e, LABEH bolu atensaun atu governu labele lakon kontrolu ba nia membru sira, tanba iha Ministeriu ou Secretariu estado sira nia okos iha diresaun barak ne’ebe mak halo sira susar atu kontrolo atividade ne’ebe sira halao.

,