“Longuinhos Laiha Konesementu Ba Teste Kilat PM2 V1”

.

Jornal Timor Post - Kinta, 22 Novembru 2012

Komandante Jeral Polisia Nasional Timor Leste (PNTL), Komisariu Longuinhos Monteiro laiha konesementu kona ba ekipa sekretariu Estadu Seguransa (SES) ne’ebe dezloka ba Indoenzia hodi teste kilat PM2 V1. 

 “Prosesu sosa kilat ne’e iha SES, sira atu haruka ekipa ida ba halo teste, maibe hau seiduak hatene,” dehan Komandante Longuinhos ba Jornalista sira iha Kuartel jeral PNTL, Caicoli, Dili, Tersa (20/11).

Ekipa ne’e atu ba teste kilat PM2 V1, forma husi SES ne’ebe envolve mos ofisial husi PNTL, maibe seidauk iha informasaun ne’ebe klaru. “Ekipa ne’e forma husi SES, ne’ebe hau la dun hatene ida ne’e,” dehan Longuinhos.

Komisariu Longuinhos konfesa, ekipa ne’ebe sei aranka ba iha nasaun Indoenzia involve mos polisia ne’ebe iha ona informasaun, maibe to’o agora nia seidauk hatene bainhira maka aranka.

Antes ne’e, Komisariu Longuinhos deside lakohi koalia kona-ba prosesu sosa kilat PM2 V1, tanba laiha prosesu ne’ebe avansa durante ne’e. Antes ne’e, Sekretariu Estadu Seguransa (SES), Francisco Guterres informa katak, Governu sei kria ekipa ida hodi aranka ba Jakarta Indoensia para koko kualidade kilat ne’e hafoin bele hola ba PNTL.

Orsamentu ne’ebe, governu aloka ba sosa kilat refere hamutuk montante 300 mil dollar Amerikanu. Entertantu tuir informasaun ne’ebe espailha iha publiku katak, kilat refere, iha nasaun Indoenzia, pesoal Floresta maka uza hodi halo seguransa ba iha area floresta nian.
.