Deputadu Bancada FRETILIN Garante; “Mandatu UNMIT Remata F-FDTL Ho PNTL Sei Sai Profesional”

.

Jornal Nacional Diario - Kuarta-feira, 07 Novembru 2012 

Mandatu United Nation Mission in Timor-Leste (UNMIT), sei remata iha fulan Dezembro tinan ne’e, tanba ne’e, deputadu bancada FRETILIN garante katak, F-FDTL no PNTL sei serviso ho professional. 

Deputado bancada FRETILIN, Estanislau da Silva hateten, durante tinan barak nia laran forsa Nasoens Unidas ne’ebe hala’o kna’ar iha Timor Leste fo treinu no apoiu bar-barak ona ba instituisaun F-FDTL ho PNTL, ne’ebe fiar katak sira sei hala’o serviso diak para servi nasaun ho povu. 

“Hau hakarak hateten ida ne’e hanesan teste ida ba ita nia PNTL no ita hotu hakarak para ita nia PNTL ho ita nia forsa ne’e hanesan forsa ida ne’ebe espesial par abele haree ba seguransa interna ninian no ita hotu hein katak, sira hotu serviso ho diak no aplika konesementu ne’ebe sira hetan atu bele haree seguransa iha ita nia rai laran,” hateten Estanislau da Silva ba JNDiario, segunda (06/11) iha Parlamentu Nasional. 

Deputadu ne’e fiar mos katak, Timor-Leste iha kontekstu ida agora ne’e la presiza ona missaun ONU nian atu existe beibeik, tanba Timor Leste merese ona hamriik mesak. 

“Hau hanoin ne’e la’os fasil, ita hotu-hotu labele hein de’it buat hotu-hotu sai maravilhas, maibe ne’e teste boot ida para ita hatudu katak ita Timor oan mos bele atu hametin seguransa iha ita nia rai laran,” informa Estanislau. 

Maske to’o agora F-FDTL no PNTL rasik hasoru difikuldade oi-oin, maibe PN iha hanoin ona katak, iha orsamentu ba tinan 2013 nia sei tau mos verba ba ida ne’e, atu nune’e bele aforsa liu tan sira nia serviso. Iha fatin hanesan, deputadu Bancada FRETILIN, David Dias Ximenes ‘Mandati’ nuudar mos membru konselu superior Defeza no seguransa, husu ba PNTL atu mantein seguransa ne’ebe diak ho imparsial ba povu tomak. 

 “Atu ita dehan F-FDTL no PNTL nia servisu bele professional liu tan, sira labele sa’e de’it kareta hodi halo paroilamentu, maibe sira mos tenki servisu maka’as atu nune’e sai diak liu tan,” dehan david Dias. 

Nune’e mos Deputada Domingas Alves da Silva ‘Bilou Mali’ husi bancada CNRT realsa katak, kona ba kestaun seguransa, nia fiar katak, F-FDTL ho PNTL sei salva no fo seguransa ba rai ida ne’e ho diak. 

“Ita halo funu tinan 24 ne’ebe laiha nasaun ruma mak fo apoiu ba ita maibe, ita sei bele halo funu hasoru nasaun bar-barak, maibe ita konsege manan independensia, tansa mak agora ita ukun an ona ital abele kaer rasik ita nia rain,” dehan Bilou Mali. 

.