“FRETILIN La Destroi Konfiansa Povu”

,

Jornal Nacional Diario - Kuarta-feira, 20 Fevereiru 2013 

Orsamentu Jeral Estadu (OJE) 2013 ne’ebe FRETILIN Vota a favor hodi passa ho unanimidade ne’e laos atu destroi povu nia konfiansa maibe hakarak kontribui ba dezenvolvimentu nasional. 

Reprejetante Bancada opozisaun FRETILIN, Estanislau da Silva hato’o lia hirak ne’e hidi responde ba preokupasaun no kritika balun ne’ebe iha katak, FRETILIN la konsisten hodi vota a favor ba OJE 2013. 

Estanislau da Silva husu ba ema ne’ebe halo kritika hasoru FRETILIN dehan, la konsisten iha politika diak liu para ona, tanba iha politika sempre iha dinamismu, laos estatiku. 

“Saida maka FRETILIN halo ne’e, hakarak kontribui ba dezenvolvimentu laos atu manan votu, votu ne’e povu maka deside, hau lakohi koalia ba ida ne’e, maibe agora agora ami hakarak halo ami nia knaar hanesan opozisaun ida ne’ebe kontrutivu, laos opozisaun ne’ebe negativu,” dehan Estanislau ba JNDiario Tersa (19/2) iha Parlamentu Nasional. 

Orsamentu ne’ebe deputadu PN aprova ona, hein katak, Ministeriu ida-idak tenke ezekuta ho diak, nune’e povu bele hetan benefisiu. 

Tuir nia, hanesan reprejetante povu iha uma fukun Parlamentu Nasional, sei halo fiskalizasaun maka’as atu haree katak osan ne’e implementa tuir dalan duni ka tama tiha fali ba saku azul. 

Estanislau fo hanoin katak, OJE 2013 ne’e, liuliu iha parte infraestrutura nian tenki aselera didiak, tuir prosesu aprovizionamentu ne’ebe los para ema hotu bele hetan oportunidade atu tuir konkursu. 

“Kona-ba implementasaun projeitu sira iha area rurais, tenki hala’o didiak atu nune’e povu iha area rural bele senti benefisiu husi orsamentu ida ne’e, laos ba deit ema ida, la’e,” dehan Estanislau. Estanislau hatutan, kona ba espekulasaun sira dehan, FRETILIN sei la halo ona opozisaun ba Governu, ne’e lalos, tanba FRETILIN hola pozisaun ne’e hakarak fo kontribuisaun pozitiva para hala’o dezenvolvimentu. 

“Ami sei halo kritika nafatin, ami sei bolu atensaun, ami sei denunsia, hau rasik, hau nia ibun ne’e sei la taka bainhira buat la’o la loos, FRETILIN sei hakilar nafatin, maibe ami laos halo buat ne’e atu tabele ba bloku hodi tama ba governu, la’e? ami iha ami nia dignidade, ami iha ami nia aprosima politiku,” dehan nia. 

.