Mericio Akara: “Kompania Mac’s Metal Graft La Selu Taxa Ba Estadu, LH Konsidera Emilia Komete Erru Bot”

.

Jornal Independente - Kinta-feira, 28 Fevereiru 2013 

Diretor Luta Hamutuk (LH) Mericio Akara husu atu Komisaun Anti Korupsaun (KAK) tenki hala’o investigasaun ona ba parte Diresaun Nasional Reseitas Impostu nian hodi buka hatene lolos faktus kona ba kompania ne’ebe deit mak la selu taxa ba estadu. 

“Ami sujere, loloos KAK, Polisia investigasaun no Prokurador tenki pro-ativu iha oras 24 nia laran tenki bah usu informasaun husi ita nia parte impostu sira,” nia dehan. 

Akara dehan, se kazu Mac’s Metal Graft, Ptv, Ltd la selu taxa, ne’e sai nu’udar evidensia forte katak, Ministra Emilia komete iha erru bot ida. “Se nia la selu taxa, ne’e evidensia forte tan, katak ita nia Ministra Emilia komete duni erru bot ida no dezastre ba ita nia orsamentu Jeral Estadu,” tenik nia. 

Kazu ne’e, nuudar dezastre, tanba Ministra Emilia ne’ebe jere osan estadu hahu la tuir regras aprovizionamentu no lei ne’ebe sira halo no eziji hodi implementa. 

Nia konsidera kazu ne’e nuudar konflitu interese ne’ebe viola lei hodi fo projeitu ba kompania ne’ebe la klaru no la registu iha impostu Timor Leste. 

Husi Luta Hamutuk nia Oklu haree katak, Lolos Emilia Pires mos tenki rejigna an ona husi nia kargu hodi labele koalia ona iha inkontru G7+, tanba Emilia komete iha kazu ida no bele hamoe imazen estadu Timor Leste hodi koalia kona ba trasnparansia. 

Entertantu, bainhira Jornal ne’e konfirma ba Vice Primeiru Ministru Fernando La sama de Araujo kona ba problema ne’e, La sama promete sei haruka nia asesor juridiku atu ba rekoila informasaun iha parte impostu nian hodi klarifika lolos. 

“Kona ba se kompania ne’e la selu taxa, hau seidauk hatene informasaun lolos, maibe hau sei haruka hau nia asesor sira bah usu tok informasaun iha neba (inpostu) los ka lae?, dehan La Sama bainhira jornalista konfima kazu ne’e foin lalais. 

La Sama dehan, kompania se deit mak tama iha Timor Leste, maske nia edifisiu iha estranjeiru tenki selu taxa ba estadu tuir lei impostu nian. 

.